The content originally appeared on:
Diario
Cu charla interesante na Impact Hub:
ORANJESTAD (AAN): Fundacion Contra Violencia Relacional (FCVR) a organisa un evento hopi interesante caminda a conta cu Impact Hub como partner den cual nan a invita ehecutivonan, profesionalnan trahando den Recursonan Humano, lidernan den negoshi como tambe entrepreneurs pa haya sa mas tocante e tema ‘Detecting the Signs of Violence Against Women’ (Detectando e señalnan di violencia contra hende muher).
E di e aspectonan importante di esaki tabata pa compronde e impacto di violencia contra hende muhe na pia di trabao y siña con pa identifica e señalnan silencioso.
Den un sala yen, e profesionalnan di FCVR a elabora riba e tema den diferente perspectiva.
Cinthia Quant, Psicologo y Program Manager di FCVR a splica cu e evento aki ta un inicio pa cuminsa papia riba violencia den comunidad, specificamente pa e area di trabao. P’esey, a invita hendenan den HR, ehecutivonan di companianan, entre otro, pa por identifica casonan di violencia ya cu esakinan tambe por sosode na trabao.
Violencia por tin un impacto den sector laboral, pero no pa bay castiga e trahadonan pa esey. Sino pa wak con por yuda nan, Quant a indica.
“E idea awe tabata pa start un conversation y papia erover y wak kico nan mes por identifica cual ta e strugglenan tambe y sa unda mester bay reenforsa”, a bisa.
Esaki tabata un oportunidad pa haya sa di e necesidadnan di e gremio pa asina por atende cu ne. Cinthia Quant a remarca cu tin hopi limitacion pa loke ta ley y implementacion di protocolnan. Tambe tin e parti di abogacia pa cual e fundacion ta lucha pa asina purba brinda mas sostene den comunidad. Nan recursonan ta limita, pero nan ta sigui pusha y bira creativo, sino no ta logra, a señala.
FCVR ta traha a base di cinco pilar di servicio cu nan ta brinda y cada un ta un mundo riba su mes. Nan ta contento cu e bon acogida y ta bay continua riba esey, e experto a duna di conoce.
E contenido di e presentacion tabata enfoca den kico ta violencia riba su mes, con pa reconoce e diferente formanan di violencia. A elabora riba e causanan tambe.
