FCVR ta clausura campaña di 16 Dia di Activismo cu estreno di e film ‘Mi a Purba’

ORANJESTAD (AAN): Fundacion Contra Violencia Relacional (FCVR) a clausura e campaña di 16 Dia di Activismo Orange the World 2025 cu estreno di e film cortico ‘Mi a Purba’ na The Movies na Gloria.

Señora Rish-Ann Ammerlaan di e fundacion, den un conbersacion cu DIARIO despues di e evento, a conta cu e film aki ta ilustra e trayectoria di un sobreviviente di violacion domestico y adapta na situacionnan na Aruba y tambe e obstaculonan cu e ta encontra den su bida y con esakinan por coordina na final.

   E tema mundial di Orange the World e aña aki a enfoca riba violencia digital cu entre otro ta encera stalking, manda potret sin consentimento di e persona en cuestion, bullying, acoso online.

   FCVR durante e 16 dianan di activismo a organisa diferente evento pa trece conscientisacion den pueblo riba violacion domestico. E fundacion a haci varios recorido na radionan y a nota cu e reaccion di publico tabata hopi bon y tabatin hopi acohida na e diferente actividadnan exitoso cu a wordo organisa conhuntamente cu otro instancianan cu ta pertenece na e comision.

   Señora Ammerlaan a remarca cu e meta di FCVR ta pa ta mas visibel den comunidad y trece mas conscientisacion riba prevencion pa hunto cu tur instancia eradica violencia na Aruba. “Nos sa cu violencia no ta facil pa caba cu ne. Nos a traha duro pa yega unda nos ta awe. Nos ta contento con e aña a bay. Nos ta mas visibel pa asina comunidad sa cu e fundacion ta existi. E aña cu ta bin nos kier ta mas den scolnan, companianan, duna mas charlanan y tayernan intensivo na profesionalnan. Mas hende sa di e topico, mas nos por brinda ayudo na otro”, señora Ammerlaan a duna di conoce.

  E acogida na e film e mainta aki tabata hopi bon. FCVR ta gradici tur fundacion cu a haci esaki un exito grandi.