E pashent mester puntra pa verwijsbrief pa di tres shot di vacuna covid-19 na su specialista

The content originally appeared on: Diario

No ta cu docter di cas mester papia: — ORANJESTAD (AAN) – Segun informacion cu un pashent di halto riesgo a haya di e asistente di su docter di cas,


ora el a yama puntra pa un  verwijsbrief pa haya e di tres dosis di e vacuna contra Covid-19, e pashent mester pidi esaki na su specialista, pa e studia su caso y dicidi si e ta acopla na e caracteristicanan di pashent di halto riesgo, cu por bin na remarca pa e di tres shot aki.

            E pashent a yama na oficina di un Oncologo, ya cu el a wordo opera na 2020 di un tipo di cancer, pero banda di esaki e ta un persona 70 plus, diabetico, hipertenso (aunke controla). El a haya chemotherapy y radioterapia na 2020 pero asina mes, e ta sigui bao tratamento preventivo.

            E pashent a puntra na oficina di su Oncologo y e asistente hopi amable y interesa pa yuda, a pidie diferente informacion, pero tambe a indica cu ta hopi pashent mas ta yamando, pasobra nan ta sinti e necesidad pa haya un di tres dosis, mirando cu e periodo di inmunidad di e dos prome dosis ta bahando, y covid ketobay tey.

            No obstante cu nan a opera na 2020 y no na 2021, pa motibo di edad y di otro factornan manera malesa di sucu y presion halto, nan ta persona vulnerable, y ta sinti cu nan tin derecho na bin na remarca pa haya e di tres vacuna contra covid-19.

            Pues, esaki ta e proceso cu e pashent tin cu sigui, no cerca docter di cas pero cerca e specialista cu ta esun autoriza pa bisa si, of bisa no, na su pashentnan cu ta desea di haya e di tres shot di e vacuna di Pfizer, cu segun e compania mes y Organisacion Mundial di Salud su inmunidad ta dura un aña y posiblemente, e virus lo bira endemico y e vacuna mester bira uno anual.