Famianan ta protesta contra cierre di seccion Respaldo Verblijf

Conoci antes como ‘Paaz’

ORANJESTAD (AAN): Siman a habri y DIARIO a ricibi den su postbus, copia di un carta cu famianan a manda pa gerencia di Respaldo, contra e recien anuncia cierre di e afdeling di ‘Paaz’ cu awendia ta ser yama Respaldo Verblijf na e Respaldo Clinica, unda pa colmo tin como 18 cliente cu ta 24/7 interna eyden pa basta tempo.

   Famianan mes a ricibi un carta desde 27 di Juli 2022 caba riba e topico aki, y despues tambe un carta di 14 di October 2022.

   Segun famianan, ya caba ora di a ricibi e prome carta na Juli, mayoria di nan a reuni cu Ministro di Asuntonan Social Rocco Tjon y su Team di GGZ.  Esey ta debi cu gran parti di e famianan a keda preocupa riba e planeamento inadecua di Respaldo pa cu e ciere di seccion di Paaz, unda no a concreta ainda e traslado of ubicacion nobo di e clientenan di un forma cla of responsable.  Debi na e falta di clairdad riba e guia continuo di atencion spiritual (basico), e famia a haye obliga na bati na porta di Ministro Tjon.

   E hecho cu Respaldo tin di corta gasto y lo bay ricibi menos fondo di AZV of di Gobierno pa atende salud mental, ta sigui di ta algo no hopi comprendible pa famia.  Nan ta kere cu e cuestion aki (dunamento di servicio) tin di wordo resolvi den cooperacion cu Gobierno di Aruba y cu e problema aki no mester wordo pusha riba lomba di e famianan.  E interes general di GGZ na Aruba ta inclui tambe e bienestar di e clientenan di Respaldo Verblijf.

   Famianan ta insisti cu pa Respaldo hunto cu Gobierno tin di garantiza un atencion humanitario (basico y/of specializa) sigur, adecuado y cu begeleiding (acompañamento) pa e clientenan di Respaldo Verblijf, prome cu e departamento wordo disolve dia 1 di November 2022.

    Pesey mes den un carta, e famianan a protesta contra ceramento di Respaldo Verblijf, te ora cu regla un traslado adecuado y aceptable, cu un atencion humanitario supervisa cu ta wordo acepta pa tur hende.