WEB Aruba NV tin varios clausula y flexibilidad den e contract pa sali di dje na cualkier momento

The content originally appeared on: Diario

Tecnologicamente no ta mira uso di hydrogen pa proximo 15 aña


ORANJESTAD (AAN): Dialuna mainta a tuma lugar e Reunion Publico di Parlamento unda a discuti den linea grandi e contract di Eagle LNG cu WEB Aruba NV.

   Un di esnan cu a hiba palabra tabata Joseph Everon, kende ta Technical Manager di WEB Aruba NV.

   Everon a bisa cu el a wordo pidi pa duna conseho tecnico y conseho economico, specialmente riba e ‘levelized cost’ y con e contract ta cera den otro.

   E contract entre Eagle NV y WEB ta un “Gas Supply Agreement”, conoci como ‘GSA’.  Pa WEB, e contract ta cuminza realmente na e battery limit, unda nan ta tuma e gas.  Y loke WEB a purba di ta sigur di dje, mirando cu e ta un contract di 20 aña, ta pa tin e flexibilidad den e contract pa e plannan cu e planta tabatin su dilanti.

    Everon a splica cu e plannan cu WEB tabatin su dilanti den nan energy-mix, ta cu renewables ta keda e push, pues esey ta leading.  Anto semper gas lo tabata e ‘transition fuel’ hunto cu storage, cu por ta bateria, of hydrogen, y tambe flywheel systems.

   Ora cu WEB Aruba NV a cuminza cu e negociacionnan, nan tabata busca pa inclui hopi flexibilidad den e contract.  Esey tabata un di e breaking-points di mas grandi cu tabatin den e contract si acaso WEB no a haya e flexibilidad pa pusha e agenda di usa renewables.

   Tambe WEB Aruba NV a pone hopi enfasis riba ‘seguridad’ den e contract.  Pesey e contract ta poni, cu na momento cu firma, tin un periodo cu Eagle LNG tin di bin cu nan pre-conditions, esta tin diferente pre-condicion stipula, y cu si acaso e compania no cumpli cu nan, e ora e contract por wordo termina cualkier momento.

   Un di e pre-condicionnan grandi ta cu tur permiso, y tur estudio ambiental mester ta poni na nan lugar.  Na momento cu cumpli cu tur condicion, nan ta haya un periodo di tres bentana (ta ser yama ‘windows’) den cual nan tin di cumpli den cierto periodo cune.  Si acaso Eagle LNG no cumpli cu e ‘windows’ di periodo aki, ta duna WEB Aruba NV e derecho di finaliza e contract.

   Apenas ora cu yega na e dia di operacion comercial, esta cu Eagle LNG por entrega gas na WEB, esey ta e momento caminda WEB lo bay haci su inversionnan.

   Everon a splica cu e motor RECIP-4 na Balashi ta cla pa ricibi gas natural.  Pues WEB Aruba NV ta cla pa switch e prome motornan pa LNG Gas.

   Despues e ‘periodo di ramp-up’ ta cuminza den e contract, unda WEB lo bay converti e otro motornan RECIP, of haci cierto revaluacion si acaso algun di nan lo no wordo converti.

   Importante ta cu ora cu ‘periodo di ramp-up’ ey caba, e ora numa e contract di Eagle LNG y WEB Aruba NV ta start.  Esey ta e ‘start date’ di e contract, ora cu WEB Aruba NV a caba di haci e conversionnan pa tuma e cantidad di gas cu tin mester.

   Loke a inclui tambe pa flexibilidad di e contract, ta e ‘periodo di nominacion’, esta ki cantidad di gas WEB lo tuma, pasobra mas renewable nan introduci den nan mezcla, ta menos gas LNG lo usa.  Pesey WEB Aruba NV mester ta sinta na e stuurwiel pa escoge ki ora ta pone e nominacion pa e cantidad di gas cu nan mester.

   “Esey ta un di e condicionnan fuerte cu nos a para riba dje,” Joseph Everon a bisa.  Pasobra pa WEB Aruba NV, e uso di renewables ta mas importante, y corda cu Gas LNG ta uno di transicion.

   HYDROGEN: Segun Everon, WEB Aruba NV a haci full un estudio riba hydrogen, y esaki ta wordo mira como uno pa haci uso di dje den futuro.

   WEB ta kere cu aki 10 aña nan lo ta cla pe, y cu subsidio di Union Europeo, kizas aki 10 of 15 aña lo por bay haya hydrogen mas disponible na escala industrial, y e motornan RECIP lo por core den un mezcla di Hydrogen y LNG Gas.

   “Pero 100% cu hydrogen pa aworaki, WEB no ta mire den proximo 15 añanan cu tecnologianan actualmente,” Everon a indica.

   El a bisa cu tin cierto decisionnan cu mester a tuma pa haci e jump, aunke WEB ta sigui busca forma pa bay pa renewables.

   El a ripiti cu e contract ta un Gas Service Agreement y si Eagle LNG no cumpli cu e condicionnan stipula, na tur momento WEB Aruba NV tin derecho di termina e contract.