The content originally appeared on:
Diario
Reconocemento postumo
ORANJESTAD (AAN): Diabierna dos siman pasa durante e actividadnan semanal cu ta tuma lugar anochi dilanti Djiespie’s Place na final di Caya Grandi, a tene un ceremonia special ora cu a bay ofrece un reconocemento postumo na un gran persona.
Hecho ta cu Djiespie’s Place a bira popular danki na e iniciativa di e gran Etty Toppenberg (d.f.m.), como cu e tabata esun cu a presenta e idea pa tene dilanti Djiespie’s Place un encuentro musical tur Diabierna atardi pa anochi, cu ta converti su mes den un ambiente bailabel. Como cu a caba di remodela Caya Principal y cu eynan te piso ta tur di klinker, el a pronostica cu e lo bira e lugar ideal pa uza como pista di baile, specialmente pa nos grandinan.
Y awor na 2024, e actividadnan aki ta mas popular cu nunca. Igor Hasham di e grupo musical ‘Nos Cu Nos’ ta toca regularmente na Djiespie’s Place riba Diabierna anochi. E ta mira con en general, nos hendenan di edad grandi no tin realmente otro lugar pa bay. Porfin riba Diabierna anochi nan a haya un lugar pa sea sinta, goza, y hasta rek pia un poco bao di e tononan musical.
Diabierna cu a pasa, banda Nos Cu Nos tabata animando dilanti Djiespie’s Place, presentando algun cancion hit cu Etty Toppenberg a haci famoso, incluyendo esun cu el a participa hunto cu Trio Huasteca den e famoso evento internacional di Festival OTI. Cancionnan aki a laga publico keda cu grato recuerdonan.
A prepara dos plakkaat special pa haci entrega e anochi aki. Uno ta na casa di Etty Toppenberg pa su gran iniciativa. Despues señora Toppenberg lo entrega e plakkaat aki na viuda di Djiespie’s pa asina colg’e paden di e lugar. E otro plakkaat ta na famia di Djiespie Franken, kende ta esun cu a sostene e actividad aki di comienso. E plakkaat aki tambe lo wordo colga na lugar special den Djiespie’s Place.
