The content originally appeared on:
Diario
Prome siman di Juni 2024 ta habri cu explosion mundial y local di noticia
*Vispera di eleccion Parlamento Europeo y amenaza Guera Mundial
*Tension eleccion Venezuela pa region y flor nobo den scandal Aruba
ORANJESTAD(AAN)—Na momento cu a wordo anuncia cu Prome Ministro Evelyn Wever-Croes a alcansa un acuerdo cu Reino Hulandes pa loke ta trata un mihor taza di interes pa e debe di Covid-19, DIARIO a splica cu e acuerdo aki a wordo firma prome cu Aruba y Reino drenta un ambiente cu lo exigi hopi atencion riba tur tereni.
Na prome lugar na e pais Hulanda mes, mundo politico ta den un situacion basta interesante, teniendo na cuanta cu awe ta vispera di e eleccionnan Europeo, cu lo dicidi riba e personanan cu lo forma parti di e Parlamento Europeo.
Pa Hulanda esaki sigur ta un momento importante. Aunke e cantidad di paisnan den un union Europeo durante ultimo temponan ta parce di lo sigui aumenta, na mes momento mas y mas ta lanta oposicion nacional na entre otro Hulanda, contra e poder di Union Europeo.
Pero esaki na e momento aki no ta e atencion principal politico cu Hulanda, cu mester termina su formacion di Gobierno cu decisionnan riba e personanan cu lo bira gobernante den e proximo Gabinete Hulandes.
Un situacion di basta suspenso na Hulanda mes, cu ta directamente envolvi den e guera na Ukraina, cu a drenta un fase nobo y atrobe ta motibo pa alarma pa un Tercer Guera Mundial resona.
E situacion mundial a drenta zona di peligro atrobe, na momento cu e pregunta mester wordo contesta si Ukraine a haci uzo di armanan cu el a ricibi di Merca pa lanza atake riba Rusia.
Por papia pues di un tension mundial sumamente serio, hasta mas serio cu nunca e guera di Ukraine tabata for di momento cu el a estaya.
Merca a duna permiso na Ukraine pa lanza atake riba cierto teritorionan Ruso, haciendo uzo di armanan Mericano, loke ta rementa mas cu un bom den e conflicto di Ukraine.
Na momento cu e situacion na Ukraine ta bira explosivo, den vecindario directo di Aruba, Nicolas Maduro a duna di conoce, cu manera DIARIO a anticipa, e no ta honra e acuerdo cu el a alcansa pa tene eleccionnan imparcial na Venezuela.
Esaki ta duna un contenido nobo na e loke por spera prome cu eleccionnan tuma lugar na Venezuela, caminda ayera informacionnan tabata indica cu cantidad di Venezolano atrobe kier bandona e pais, teniendo cuenta cu e situacion cu por spera despues di eleccion.
Na Merca, sinembargo, Presidente Biden a introduci limitacion di asilo di Venezolanonan cu huy di Maduro pa bay Merca, mientras na Mexico tin cantidad di Venezolano cu kier a trata di drenta Merca prome cu e Presidente nobo di Mexico cu tin simpatia pa y cu Maduro, tuma poder na e pais cu e lo goberna a base di e resultado di eleccion na Mexico.
Venezuela ta prepara pa eleccion dia 28 di Juli y manera DIARIO a adverti Aruba mester ta prepara.
Si e situacion den Reino ya ta problema, na Aruba mes problema a culmina ayera ora autoridad a drenta espacio di gobernacion, den buskeda di mas informacion den otro scandal cu ta rementa na Aruba y den e caso aki den otorgamento di permiso.
Mientras autoridad ayera a duna inicio na investigacionnan den e ambiente gubernamental di Aruba riba tereno di otorgamento di permiso, Prome Ministro Evelyn Wever-Croes a adverti, cu manera semper el a indica cu e no ta sostene loke ta contra ley y cu e ta tene su mes na e principionan cu gobernacion no por wordo mancha pa scandal.
Prome Ministro Evelyn Wever-Croes a abstene su mes di tur comentario riba contenido di e caso.
Juni 2024, manera DIARIO a pronostica, ta trece cantidad di desaroyo pa Aruba, pa Reino, pa region y pa mundo henter y DIARIO lo informa Aruba debidamente.
