Subasta di arte pa yuda damnificadonan na Venezuela y Colombia

Organisa pa Boardwalk Boutique Hotel

ORANJESTAD (AAN): Arte local semper ta importante na Boardwalk Boutique Hotel situa na Palm Beach cerca di Bakval.  E biaha aki dos pintura crea door di artista Suelyn Dankerlui, esta “The Sunrise” y “Sunset” riba e seccion aki di Palm Beach.

   E pintura di “The Sunrise” lo bay keda pa semper na Boardwalk Boutique Hotel, sinembargo e pintura di “Sunset” lo bay wordo poni na subasta, pa sostene e esfuerzonan di yudansa humanitario di temblornan recien den region.  Pues un hende lo por bira doño di e pintura.

   E persona cu ofrece miho placa den e subasta aki, lo por bay cu e obra di arte aki.  E oferta ganado lo wordo entrega na causanan cu ta hopi personal na e team y na comunidad di Aruba.  Hopi di e personal tin famia y amigonan na Colombia y Venezuela, y por a mira loke e temblornan di ultimo lunanan a haci cu e habitantenan aya.  E subasta aki pues ta un forma chikito pa duna un man.

   E subasta di arte aki a start Diabierna 21 di Augustus 2026, y lo finaliza riba Diadomingo 6 di September 2026.