The content originally appeared on:
Diario
Controlador di Pueblo den Parlamento ta controla su produccion criminal
*”Verkapte verkiezingen”di Reino ta mara Parlamento na Gobierno
*Benny cu e privilegio, salario y consehero pa controla kico???
ORANJESTAD(AAN)—No ta prome biaha cu DIARIO ta presenta e punto di bista aki. No ta solamente DIARIO ta lanza e pregunta grandi, si no mester busca e culpable berdadero di posibilidad di criminalidad den mundo di politica activo, den e sistema cu Aruba mester duna contenido na su democracia.
For di momento cu Huez a dicta un sentencia, Benny Sevinger a bandona e banki di acusado pa bira oficialmente un persona condena na prizon pa actonan criminal den cual e lo mester a crea e neishi di haraña, manera Fiscal a trece dilanti den Corte.
Aruba na e momentonan aki conoce mas cu un simpel bofon di su sistema legal y democratico, cu ta haci posibel pa Benny Sevinger como miembro di Parlamento, tin privilegio, salario y hasta si e kier asistencia profesional, pa e indaga den tur documento cu por a wordo produci dor di Parlamento di Aruba y hasta tur trabou cu el a haci como Ministro, cu a resulta den su condena den prison.
Un situacion sumamente serio ta presente na Aruba y hasta por conclui cu e sistema electoral di Aruba a perde su base solido y ta sostene un cultura di clase.
Benny Sevinger tin un situacion preferencial na e momentonan aki, den cual e ta den servicio di Pueblo di Aruba, ta wordo paga cu placa di belasting di e Pueblo di Aruba, aunke el a wordo condena pa e hecho cu el a haci bofon di leynan di Aruba.
Con serio e situacion ta, lo bini dilanti, ora tene na consideracion cu e mayoria den Parlamento di Aruba tempo Benny Sevinger tabata Ministro, ta su partido AVP, cu den Parlamento a faya di controla Benny Sevinger cu a duna trato preferencial na e amigonan mas intimo y baluartenan di AVP.
Den e caso aki por nota cu e baluartenan di AVP mes cu a wordo condena, no ta ni wordo menciona mas pero tur atencion di AVP ta, pa saca Benny Sevinger for di su situacion.
Con Aruba lo conoce un cambio pa e situacion politico cu actualmente ta haya tur atencion den exterior pasobra na poco pais un ex Ministro condena na prison, por ta Miembro di Parlamento?
E momento a yega pa separacion di eleccionnan manera na diferente instante DIARIO a presenta.
Mester tin eleccion separa pa eligi Parlamento di Aruba y eleccion pa personanan cu lo fungi den Gobierno di e pais.
Mester pone un fin na loke ta wordo yama “verkapte verkiezing”den cual Parlamento ta scoge Ministronan cu tin mas poder cu e Miembronan di Parlamento mes, manera e caso di Benny Sevinger a trece dilanti.
Legalmente no por tene ni Prome Ministro Mike Eman responsabel pa e no a mira kico ta pasa den vecindario directo cu su amigonan. No por tene e fraccion di AVP cu a pone Benny como Ministro responsabel pa nada.
Sinembargo, sin e sosten di fraccion di AVP den Parlamento, e no por tabata Ministro y no por a wordo acusa awe di tur loke a bira su condena.
Separacion di poder na Aruba mester bira un realidad y DIARIO lo sigui amplia riba e tema aki, cu ta prueba di buraconan serio den e sistema legal di e pais.
