Eduard Pieters ta representa fraccion di PPA na Hulanda cu meta ‘Nos autonomia no ta negociabel’

ORANJESTAD (AAN): Parlamentario Eduard Pieters di Partido Patriotico Arubano (PPA) ta actualmente na Den Haag, Hulanda, hunto cu e otro coleganan parlamentario,

pa participa den un serie di reunion importante relaciona cu e futuro di Reino Hulandes y e Rijkswet di Supervision Financiero.

   Segun Pieters, e biahe aki tin dos meta esencial: cera conoci cu e miembronan nobo di Parlamento Hulandes despues di eleccion, y reafirma e posicion firme di PPA tocante autonomia y autodeterminacion di Aruba. “Ta un momento crucial pa establece contacto, intercambia idea y trece bos di Aruba na manera digno y constructivo,” Pieters a expresa.

   Dialogo: Awor PPA ta boga pa dialogo riba Rijkswet di Supervision Financiero. For di september pasa, fraccion di PPA a entrega un Nota di Minoria tanto na e stakeholdernan local como Tweede Kamer na Hulanda. E documento aki ta presenta alternativa concreto y realistico, pa segura cu Aruba por mantene maneho financiero responsabel sin perde su autonomia. Awe, durante e proome reunion di Comision di Reino, unda tabatin e representantenan di Aruba, Curaçao, Sint Maarten y Hulanda, Pieters a bolbe enfatisa e contenido di e Nota di Minoria aki.  “Nos a ripiti claramente pa kico supervision financiero via un Rijkswet no ta adecuado ni oportuno pa pais Aruba,” el a bisa.

   E reunion tabata den un tono positivo, constructivo y di respet mutuo. Songül Mutluer, miembro di Parlamento Hulandes di PvdA/GL y presidente di Comision di Relacionnan di Reino, a dirigi e sesion aki. “Nos a logra un dialogo sincero riba base di respet. Nos a trece na mesa, no solamente critica, pero tambe e solucionnan concreto pa un futuro financiero sostenibel pa Aruba,” Pieters a declara.

   Meta di PPA: Construyendo relacion y defendiendo dignidad nacional. E dia di awe na Den Haag ta describe como uno historico, pasobra ta e prome biaha cu fraccion di PPA por a presenta su posicion fisicamente y directamente den Comision di Reino, despues di entrega di e Nota di Minoria. “Nos ta sigui construi brug pa nos no perde nos rumbo.

   Nos autonomia no ta negociabel, pero nos ta cla cu tin bon cooperacion y dialogo, cu ta e via pa progreso den Reino,” Pieters a enfatisa.

   Segun e parlamentario, prooximamente PPA tin programa varios reunion cu diferente partido politico Hulandes, cu ta comparti ideologia similar riba husticia social y autonomia responsabel.

“E combersacionnan ta mustra di ta prometedor. E ta tuma tempo, pero e proceso ta bay bon. Nos ta logra pa e bos di Aruba haya oido y e palabra ‘autonomia’ keda nos compromiso real,” Pieters a conclui.

   Pa conclui fraccion di PPA, mediante su representante Eduard Pieters, ta manda un mensahe cla:

“Aruba ta un pais chikito, pero cu un pueblo grandi den curashi y dignidad. Nos ta parti di Reino, pero nos no ta subordina. PPA lo sigui defende e principio di igualdad, respet y autodeterminacion pa un futuro di stabilidad y progreso pa Aruba,” Eduard a finalisa bisando.