Lo kier sa kende ta e auditornan cu ta controla Utilities Aruba NV

The content originally appeared on: Diario

Asociacion VWI keto bay preocupa

ORANJESTAD (AAN): E asociacion VWI cu ta consisti di profesionalnan trahando na WEB Aruba NV, ta lamenta cu keto bay nan no a haya contesta riba serie di pregunta cu nan a lanza riba e situacion, unda diripiente ta mira cu Utilities Aruba NV ta sali for di su “circulo” di job-description, y awor e ta encarga pa busca proyecto di molina pa WEB Aruba NV.

   Pakico haci esey?  Siendo cu Aruba mes tin grupo di ingeniero capacita laborando den WEB Aruba NV.

   Pesey mes, na forma exitoso den pasado, WEB Aruba riba su mes a logra cu dos decada anterior a logra pa lanta e parke di molina na Vader Piet.  Semper WEB Aruba riba su mes a traha y bin cu proyectonan di balor historico, manera plantanan di awa di Aquachem, plantanan awor di genera coriente di RECIP.

   WEB Aruba NV a haci e proyectonan ey sin ningun problema, y tur cos a wordo bon controla.  WEB mes tin 3 Auditor interno cu ta controla tur proceso financiero di e proyectonan.  Y tambe dos biaha pa aña tin Auditor externo cu ta bin acerca pa haci e controlnan aki.

   Segun Richard Frank di VWI, pesey awor nan kier sa, kende ta controlando Utilities Aruba NV?  Cual ta e Auditornan cu ta controlando Utilities?

   VWI a manda un carta pa Utilities Aruba NV cu exigencia pa: (1) Stop cu e EOI pa e 2ndo proyecto di Molina.  (2) Pa pidi e comision di Corporate Governance pa bin sondea e governance di e EOI.  (3) E uitspraak di Corporate Governance commissie aki lo tabata bindend.

   Den fin di siman, Utilities Aruba NV a contesta VWI pa bisa cu nan lo no stop cu e EOI, y cu Utilities no ta di acuerdo pa a pone e miembronan ey proponi den e Comision (esta Sr. Kunnemans, Sr. Lacle, y Sr. Refunjol) pero pa pone otro miembro di nan, hunto cu Sr. Refunjol, y tambe cu e uitspraak no ta bindend y cu nan lo djis considere como ‘conseho’, y e ora nan lo evalua e conseho di esey.

   Pero esey no ta loke Asociacion VWI a pidi.  Pues na final Utilities no a bay di acuerdo cu esey.

   VWI a manda carta tambe pa Vaste Commissie di Energia di Parlamento.  Tambe grupo di gremio a manda carta pa Prome Ministro pa reuni cune, y a haya contesta cu e no por papia cu VWI, como cu e no tin tempo.  Tambe VWI a manda carta pa President di Parlamento pa tene un reunion cu parlamento mes, pero no a haya contesta riba esey ainda.

   Segun VWI, e EOI cu a ser teni unda a divulga cu tin 28 compania interesa pa bin cu Parke di Molina, tabata “algo ilegal”.