E siguiente paso ta e certificacion di Good Agricultural Practices (GAP)

​

Minister Ursell Arends: Paso historico pa Sector Agricola:

ORANJESTAD (AAN):  Aruba su sector di agricola ta unico den e simpel hecho cu nos ta enfrenta diferente desafionan. Pa cunukeronan, e retonan pa cuminsa un negoshi di agricultura ta varia di clima, tereno, conocemento, financiamento y costo di produccion.

            Sinembargo, Aruba su hendenan ta mas unico ainda. For di sistema hidroponico te cu agroforesteria sintropico, Aruba su agricultornan ta liderando cu metodonan cu por defini e futuro di cultivo den regionnan cu tambe ta enfrenta desafio di por ehempel clima.

            Dialuna durante conferencia di prensa, Minister Ursell Arends y Minister Geoffrey Wever, hunto cu Sra. Nathaly Harms di Qredits Aruba a lansa oficialmente e Agrifund. A traves di Qredits Aruba, agricultornan por aplica pa financiamento na un interes reduci di 2% pa sumanan entre Afl. 5.000 te cu Afl. 200.00. Den e forma aki ta facilita e proceso pa agricultornan por sigui desaroya y brinda producto riba mercado local.

            Di parti di Gobierno di Aruba, inauguracion di e Agrifund ta un paso historico y ta refleha e compromiso firme pa fortalece e sector agricola. Agrifund ta simbolisa cumplimento cu no solamente agricultornan diligente pero tambe cu tur ciudadano door di promove e vision pa haci siguridad di alimentacion un realidad concreto.

            Presente tabata Sr. Rendell de Kort kende a elabora riba e onderzoek cu e la conduci riba siguridad di alimentacion na Aruba como consultor di World Bank. Un di e sugerencianan di e rapport a toca e parti financiero, cu awor ta wordo realisa den forma di e Agrifund. Tambe e Director di Aruba Agri Development Company N.V., Sr. Jeremy Croes a enfatisa e importancia di tin contacto directo cu nos agricultornan y tende di nan experiencia y sigur nan sugerencianan pa mehora sector primario.

            Segun Minister Arends e siguiente paso den e vision ta e certificacion di Good Agricultural Practices(GAP). GAP lo asegura calidad den produccion agricola, atendiendo cu preocupacionnan di consumidor tocante salud y sostenibilidad ambiental.

            Minister Arends ta termina gradiciendo Sra. Nathaly Harms y su ekipo di Qredits Aruba pa nan colaboracion pa cumpli cu e vision di Agrifund. Qredits nan dedicacion y experticio tabata instrumental den e realisacion di Agrifund.

            “Cu un vision comparti pa haci di sector primario un pilar economico nobo ta pone cu awe den union, nos ta cumpli cu e agricultornan na bienestar di nos comunidad. Hunto nos ta cosecha futuro” — Minister Ursell Arends

 galleryE siguiente paso ta e certificacion di Good Agricultural Practices (GAP)/gallery