E reto di diversificacion economico pa henter comunidad

​

E pandemia a duna prueba di peliger di economia dependiente di turismo

 *Gremionan mester prepara pa e resultado di economia mas grandi

*E cifranan importante pa adapta comunidad na expansion economico 

ORANJESTAD (AAN) — Uno di e pruebanan mas grandi cu historia a entrega Aruba riba e vulnerabilidad di un economia cu ta depende basicamente di turismo, tabata e epoca di pandemia Covid-19.

Dos factor a haci cu Aruba no a wordo confronta cu situacionnan desastroso cu e pandemia tabata tin na hopi pais, debi na e impacto cu e tabata tin riba e bida social di poblacion como resultado di e importancia di economia como base productivo pa entrada di hende.

Econonomia, sinembargo, no ta depende solamente di e e sumanan cu ta wordo inverti pa por introduci negoshi. E exito economico, ta depende tambe di e cantidad di trahadornan cu un comunidad tin na su disposicion pa realiza e trabounan necesario.

Na mes momento, e alanan economico cu ta sostene entrada di un negoshi nobo, mester ta presente.

Algun dia pasa, DIARIO a profundisa den e necesidad pa e mercado laboral di e pais por cubri e cantidad di trabou cu tin na un pais.

Mester atende e punto aki den su contexto berdadero, pasobra e hecho cu tin cantidad di hende sin trabou, no ta nifica cu tin suficiente trahador pa haci e trabou cu economia ta produci.

Den e cuadro aki, e posibilidadnan pa capacitacion di personal na Aruba tabata y ta keda di importancia grandi pa Gobierno, cu no ta e unico responsabel pa un pais funciona.

For di momento cu Aruba a cuminsa papia na un forma serio di posibilidad di presencia di sigur gas den e subsuelo di su teritorio, tin trabou pa tur gremio.

Gobierno Wever-Croes actualmente ta papia a base di posibilidad cu ta e prome tanda di investigacion basico a trece dilanti.

Ademas ta importante tambe, cu no a cuminsa papia di gas, cu na e momentonan aki, manera DIARIO a trece dilanti, ta den estudio pa e forma cu por deshaci di e parti peligroso pa salud di hende na un forma mas optimal posibel sigur den e temporada di transicion.

Aki nos ta subraya e tempo di transicion, den cual investigacionnan cientifico ta indica, cu por baha e peliger di contaminacion di aire produci pa gas.

Mientras e preguntanan tecnico mester duna contesta, tin otro factornan cu tur gremio na Aruba mester atende.

Cuanto trahador Aruba por produci riba e tereno di tecnologia? Tin un inventario di e cantidad di trahador halturamente cualifica pa traha den sector industrial, cu ta traha den exterior actualmente y lo por bolbe Aruba?

Aruba por produci suficiente trahador pa e sector industrial pero tambe pa tur ramo cu mas produccion economico lo afecta na forma favorabel?

Den e diversificacion economico di Aruba nos ta topa entre otro cu Eagle y e realisacion di su participacion na Aruba. Nos ta topa cu Acciona cu hidrogeno pa Aruba.

Con conhuntamente ta atende cu e parti di sector laboral, cu lo exigi vivienda, mas localidad cu ta bende cuminda, mas transportacion, mas lugar pa recrea, zapateria, boutiques y tur loke hende mester?

Na e momentonan aki, tur sector di Aruba, pues ademas di Gobierno, mester cuminsa haci estudio si nan ta capaz pa funciona debidamente den un economia diversifica cu ta crece.

Nos ta papia aki di tur loke ainda Eagle lo produci pa economia, cu mester adapta su mes na tur loke transportacion ta exigi den cambio di clima.

E dinamismo cu cual Gobierno a atende cu economia di Aruba, cu na un forma historico a conoce recuperacion sigur como pais chikito y sin recurso natural pa industrialisacion, awor ta exigi di tur partner den comunidad, pa haci estudio pa por adapta nan mes na e demandanan nobo cu lo tin cu amplacion y diversificacion economico.

Ya for di temporada di exploracion, Aruba mester comprende cu e lo ta mas den atencion comercial, manera diferente otro pais cu manera DIARIO a relata, den e ultimo temponan di petroleo, kier entrada di loke nan tin den nan subsuelo.

Prome cu e resultado di exploracion ta conoci, Aruba mester biba cu realidad.

Den tur trankilidad, Aruba mester busca e siguransa cu e ta prepara, di e necesidad basico di hende, te preparacionnan extra cu lo mester, si resulta cu Aruba tin gas den su subsuelo.

Aruba mester traha riba posibel ampliacion di su infrastructura economico y social si esaki bira necesario.

Aruba ta wordo confronta cu un reto nobo, cu sin duda Aruba por enfrenta!