E importancia di no neglisha e balor di un seguro di biahe

​

Relaciona cu caso di hoben cu a fayece na Aruba

*Famianan ta keda na angustia financiero pa su repatriacion 

ORANJESTAD (AAN):   E caso di e hoben colombiano, Sergio Nicolas Castillo, cu a muri hoga durante su biahe na Aruba ta resalta e importancia di un seguro di biahe pa evita gastonan grandi di tratamento medico of repatriacion di curpa den caso di un accidente of tragedia manera tabata e caso aki.

            E hoben aki, su novia y amistadnan cu cual el a biaha, segun tur cos ta mustra, no tabatin un seguro di biahe y awor ta confronta cu problemanan pa paga gastonan di hospital y pa repatria e hoben fayeci na su pais di origen.

            E grupo di hobennan, a laga cu nan a yega Aruba dia 8 di Maart. Mientras cu nan tabata na beach, na Palm Beach, nan a sinti falta di Sergio, ken a drenta lama. Su pareha a bay busk’e den lama y a bin hay’e fo’i tino.

            Nan a bati alarma y a logra dun’e prome auxilio. Ambulans a bay cu ne hospital. Pero su siguiente dia, el a wordo raporta morto. E tabatin morto cerebral. Ta hopi awa a drenta tambe den su curpa.

            E fayecimento di e hoben aki sigur ta algun hopi lamentabel y sigur ta trece dilanti e seriedad di no tin un seguro di biahe, ora di haci un biahe pa paisnan stranhero.

            Mientras cu tur hende ta normal pa spera lo miho durante un biahe, ta esencial pa ta prepara pa eventualidadnan manera malestar di salud of un emergencia cu por surgi.

            Un seguro di biahe por ta e diferencia entre paga sumanan grandi pa tratamento medico of repatriacion di restonan funebre, y tin un proteccion financiero cu ta cubri esakinan. Cu e situacion actual di e hoben colombiano, ta claro cu no tin un seguro di biahe por tin consecuencianan financiero serio pa famia y amistadnan cu ta keda patras.

            Como resultado di no tin un seguro di biahe, famia y amistadnan di e hoben colombiano no solamente ta atende cu e perdida tristo di nan ser keri, pero tambe ta sinta bou di un carga financiero grandi pa paga gastonan medico y pa repatria e curpa fayeci.

            Pa evita situacionnan manera e caso di e hoben colombiano, ta importante pa tur hende cu ta planea un biahe pa asegura nan mes c’un seguro di biahe adecua. Esaki ta duna seguridad no solamente na e persona mes, pero tambe na nan sernan keri den caso di un emergencia.

            E caso di e hoben colombiano ta sirbi como un recordatorio di e consecuencianan di no tin un seguro di biahe. Ta un les for di un experiencia lamentabel cu tur por tuma na consideracion pa keda prepara y proteha durante nan vacacion of biahe di trabao leu fo’i cas.

            E caso aki awor a bira un tema internacional pa motibo cu e familiarnan lo mester paga mas di 20 mil dollar na gasto di hospital of di cremacion (posibilidad cu lo sali nan mas economico cu e repatriacion di e curpa).

            Ya caba El Tiempo di Colombia a publica un articulo exponiendo e tema caminda ta enfatisa riba e suma exagera cu lo mester paga pa atende cu e situacion, pero cu lo por a wordo evita den caso cu a conta c’un seguro di biahe.

            DIARIO ta extende palabranan di condolencia na e famia y conocirnan.