The content originally appeared on:
Diario
Natalie Maduro, director Santa Rosa:
*E alianza aki tin e mesun meta pa cada isla
ORANJESTAD (AAN) —Natalie Maduro, director di LVV (Santa Rosa), a sigui relata den entrevista cu DIARIO tocante e Conferencia Dutch Caribbean Agriculture Livestock 2024, cu tabata sumamente exitoso y informativo.
“Cada isla riba e conferencia a duna su presentacion riba e testnan of e comisionnan cu cada isla tabata responsable p’e, y den nos caso Aruba tabata responsable pa e parti di e gap”, Natalie Maduro a señala.
“Manera Minister Ursell Arends a anuncia algun siman pasa, e proposicion cu a wordo manda pa su persona door di e Comision, cu a consisti di Santa Rosa, Departamento di Asuntonan Economico, DNM y DVG, nos a mand’e conseho, el a aprob’e y e ta bay bira un ‘pilot’ cu nos ta bay cuminza e aña aki, nos a duna un update riba esey. Tabata tin Sint Maarten cu ta encarga cu e parti di proyectonan escolar, y locual ta bunita pa wak ta cu e doel di e organizacion aworaki, cu ta yama oficialmente, ‘Dutch Caribbean Agriculture Livestock & Fisheries Alliance’, tin e mesun meta pa cada isla”, Maduro a indica.
“Nos, tur seis isla ta reconociendo e limitacionnan cu nos tin den cuminda, nos ta wak cuanto nos ta importando for di exterior, nos ta wak cuanto divisa ta bay afo, nos ta wak e parti di seguridad den cuminda, tambe e importancia di intercambio di conocemento y informacion”, Maduro a menciona.
El a agrega cu durante e conferencia nan a discuti diferente estrategia, con por implementa awo, e deseonan cu e Islanan tin, e oportunidadnan cu nan a wak durante esaki.
“Un di e necesidadnan cu nos a bin realiza ta cu si nos por logra haya un barco di carga, por ehemplo, cu por wordo financia y maneha for di e seis islanan, tin hopi producto cu aworaki nos ta bezig ta importando, di hopi mas leu, nos mes entre e seis islanan por abastece otro”, Natalie Maduro a señala.
El a pone e ehemplo di e temporada di Covid, unda cu danki Dios e parti di importacion di cuminda no a sufri ningun limitacion, pero nos no sa nunca kico por pasa. “Nos ta wak esey como un modelo cu por aporta na nos den nos seguridad di cuminda”, Natalie Maduro a subraya.
Finalmente, Maduro a bisa cu e conferencia a bay hopi bon, e islanan tabata hopi entusiasma mes, lo sigui traha hunto y nan tin un logo oficial awo, y e proximo stap cu nan ta bay tuma ta nan intencion di bay Hulanda na November, pa duna un presentacion na e Ministerio nobo di Landbouw di Hulanda, pa wak e parti di fondonan cu tin.
“Tin hopi fondo cu ta wordo aloca pa proyectonan di medio ambiente y naturaleza, pero mi ta kere cu e parti di agricultura tambe, y cu e conocemento cu Hulanda mes tin nan lo ta un support grandi pa e alianza aki pa yuda nos unda cu no tin e fondonan localmente, nan aporta nos”, Director di LVV, Natalie Maduro a duna di conoce.
