DOW cla pa introduci na Aruba e sistema Iris “Integrated Road Infrastructure System” na henter e careteranan

Dayl Lue, Hefe Operacion DOW:

ORANJESTAD (AAN) – Departamento di Obranan Publico “DOW” ta bay introduci e sistema di Iris “Integrated Road Infrastructure System) na Aruba. E sistema ski, un grupo di trahado di DOW a ser conoci cu ne, dos aña pasa y e intencion ta pa scan e camindanan. Den un entrevista cu e Hefe di Operacion di DOW, señor Dayl Lue, el a splica tocante loke e sistema aki ta encera.

            Lue a bisa cu esaki ta un sistema automatiza hopi mas avanza, cu DOW ta bay uza pa inventariza tur e careteranan di Aruba, cu tur e señalnan cu tin manera borchi, mata, palo di luz, tur caminda cu tin unda e camara ta graba, inventariza y registra, y ta haci inspeccion si e careteranan ta den bon condicion, si tin buraconan riba caminda, si e borchinan ta bon, y tur informacion ta hink'e den DOW su sistema.

            Esaki ta duna un stap mas lihe y eficiente, unda nan ta haya tur e trabaonan pa haci den e camara y loke DOW tin cu haci ta cuminza planea esakinan. “E ta duna nan tambe un miho bista di den ki estado nos careteranan ta, unda nos ta wak cu tin mas daño material y con pa nos hacie mas eficiente posibel”, señor Lue a comenta.

            Lue a splica cu DOW lo scan henter Aruba prome, pa wak cuanto kilometer di caminda ta, cuanto km di asfalt mester, y ora tin tur cos inventariza, lo cuminza registra na inspeccion, y a base di esey, lo por bisa si enberdad nos camindanan ta den mal estado, y unda mester cuminza mehora.

            “E lo yuda nos tambe ora nos ta planifica nos trabao pa haci esaki lo miho posibel”, Lue a subraya.  E ta un sistema con nos por tin’e mas visual, y e ora ey un  caminda cu nos ta hayando nos atencion, e lo por hay’e debidamente”, el a agrega.

            Señor Lue a splica cu e camaranan ta na Aruba caba, y for di awo DOW por cuminza patruya rond, p’asina inventariza e camindanan.  E inventarizacion lo dura un of dos siman na full Aruba. “Nos tin cinco unidad cu lo por bay core full nos careteranan. Nos sa cu, ongeveer, nos tin 1.108 kilometer incluyendo caminda di santo. Esaki ta duna nos un miho bista, p’asin’ey inventariza y inspecciona e camindanan manera cu mester ta”, señor Dayl Lue, Hefe di Operacion di DOW a indica.