Dos funcionario importante di Hulanda a bay bishita Santa Rosa

ORANJESTAD (AAN): Riba Diadomingo mainta, esta riba Dia di Betico, Santa Rosa tabata tin e placer di ricibi e bishita di

Sra. Ayse Breukelaar-Uslu (senior advisor) hunto cu Srta. Anne Gorter (organisatie adviseur) pa e instancia O&P Rijk den representacion di e Ministerio di Asunto nan Interno di Hulanda.

   Nan a wordo acompaña pa Sra. Gabriella Kock-Helder, Beleids Medewerker pa e Departamento di Recurso Humano di Aruba.

   Sra. Nathalie Maduro, Director di Santa Rosa a duna un recorido y elabora ariba e diferente seccion nan den Santa Rosa y e responsabilidad y tarea nan cu e Departamento ta encarga cu ne. Tambe a splica encuanto e diferente projecto nan cu tin programa door di e Ministerio di Sector Primario y a splica tambe encuanto di e proposito y meta nan di e aliansa DCALFA cual ta forma door di e 6 isla nan Hulandes pa stimula mas collaboracion y intercambio di conocemento ariba e thema nan agricola y di pesca.

   Cu hopi orguyo por bisa cu apesar di tur limitacion cu e departamento ta wordo confronta cu ne, e dama nan a keda asombra di mira cuanto producto por wordo cultiva y produci riba e isla. Na final di dia, nos produccion local ta ofrece tambe oportunidad nan secundario na otro sector den forma di producto nan fresco y local  manera nos sector turistico, salubridad y social pa menciona algun.

   Un danki na DRH pa e oportunidad di laga e bishitante nan bin sera conoci cu nos departamento y asina compronde e balor agrega cu Santa Rosa ta representa pa Aruba y su comunidad.