Accident violento riba caminda di Ponton a exigi bida di un cantante di Bachata

The content originally appeared on: Diario

Mingo Encarnación Heredia a bira di 11 morto den trafico

ORANJESTAD (AAN): E prome yamadanan a cuminza drenta Diadomingo marduga banda di 2:05 am na Central di Polis.  Personanan a yama cu tin un accident frontal entre dos auto na altura di e sucursal di All To Car, riba e caminda di Playa pa Noord, na altura di Ponton.

   Mesora unidadnan di Polis a cuminza wordo manda na e lugar, mirando cu ta mas yamada a sigui drenta.

   E prome unidad di Polis cu a yega, a bin ripara cu e accident ta net na e Cruzada-T di caminda di Ponton cu Caya Cocorobana.  Pues e ta como 45 meter pazuid di All To Car.

   Agentenan a topa cu un auto y un pickup benta banda pariba di caminda na e T-weg aki, net dilanti porta di cura di e cas Ponton 46.  Esaki ta diagonal dilanti ex-edificio di iStore.

    Chauffeur pega den auto: Polis mesora a bin mira cu tur dos chauffeur ta basta herida, y inmediatamente a core pidi presencia urgente di Ambulans.  E accident tabata entre un Suzuki Baleno sedan color blanco cu number A-32334, y un Toyota Tacoma pickup shinishi cu number A-3851.  Ora cu a mira cu e persona den e Suzuki ta pega den e auto, a rekeri personal di Vehiculo di Rescate di Cuerpo di Bombero tambe.

   Mientras tanto, unidadnan di Polis a cera e pida caminda aki, for di banda di WEMA Hardware na Ponton, y tambe na e rotonde di Watty Vos Boulevard, cu ta keda 115 meter mas pazuid di lugar di accident.

   E prome unidad di Ambulans cu a yega na e lugar, a core bay check situacion di e chauffeurnan.  Aki lamentablemente nan no a nota ningun señal vital mas na e chauffeur masculino cu ta den e Suzuki Baleno.

   A bay check e chauffeur di e Toyota Tacoma, y a mira cu el a bay dal cu su cabez den windshield, ta sangrando na cabez y ta seriamente herida.  Aki ta unda mesora e enfoke di Paramediconan a sigui pa asina sake di e vehiculo.

  Cu asistencia di mas hende, a logra saca e chauffeur di e Toyota pickup, y a bay cune rumbo pa Hospital pa ricibi tratamento inmediato na Servicio di Emergencia.  Autoridad a bisa cu su situacion ta stabil.

   Corta e vehiculo: Personal di Vehiculo di Rescate asina a cuminza traha riba e Suzuki Baleno, y nan a kita tur dos porta, a corta e B-pillar afo, y asina a logra saca e victima, y a pone eybao, solicitando Centro di Alarma pa manda busca un Docter.

   A logra haya Dr. Texier cu a yega na e lugar, y pa 2:40 am el a constata morto di Domingo Encarnación Heredia, naci dia 28 di Januari 1977 (45 aña) na Republica Dominicana.  E auto mes ta registra na un adres na Palm Beach.

   Causa di accident: Mirando e hecho cu e accident aki a socede net na un T-Weg, ta bin e teoria cu uno di e vehiculonan aki a yega di Caya Cocorobana y no a primi brake, y a bay dal den otro.

   Specialista di Trafico di Cuerpo Policial a wordo yama, y a busca personal forensico di BFTO tambe pa asina haci un investigacion, y determina kico por a pasa.

   Sinembargo vocero policial Liliana Rasmijn a informa prensa cu muy probablemente ta trata di un accident frontal, y ambos a finaliza pariba di caminda.  Tin varios negoshi eybanda, incluyendo Mei Da Supermarket net 30 meter pazuid cu lo por tin security video camera cu ta yuda Polis saca nan conclusion.

   A pone personal di Bureau Slachtofferhulp tambe na altura si acaso famianan yega eynan.  Pero no a mira ningun miembro di famia presente.

  Finalmente agencia funeraria a presenta pa asina bay cu e fayecido di e lugar.

   Domingo Encarnación Heredia, mihor conoci como ‘Mingo’, a bira e di 11 morto den trafico pa 2022 na Aruba.  E ta hopi conoci na Aruba como un guitarista y cantante den ritmo di Bachata, y ta activo tambe den grupo musical.  Su profesion mes ta mecanico.

   Riba un otro pagina den DIARIO, por mira un otro accident fatal cu a socede un poco mas di 4 ora despues di esun aki.

   Na famia di e fayecido, DIARIO como tambe Cuerpo Policial ta manda palabra di condolencia.