Tur intento pa yuda e mammal tabata envano
ORANJESTAD (AAN): Diamars a habri cu e informacion mainta, unda Aruba Marine Mammal Foundation a divulga cu nan tin mal noticia. Esey ta cu Dialuna anochi, e dolfijn Charlie a stop di mantene su mes ta drief despues cu e tabata bayendo den bon direccion pa recupera.
Tabatin boluntarionan den lama cu ne, pa yud’e pa asina e no por hoga. Pero pa 11:35 pm su curason a stop di bati. El a muri rapidamente, mientras e tabata wordo carga suavemente den awa, y no a sufri.
Aruba Marine Mammal Foundation y boluntarionan, ta gradici tur hende, comunidad, y piscadonan pa nan compasion y amor demostra, y cu e dolfijn tabatin un chens di haya un bida nobo despues cu el a bin pega na costa, y cu tur hende a haci nan best pa yud’e. Nan ta manda bisa danki na tur hende pa e yudansa yen curashi y balente demostra den e ultimo dos simannan.
Lo bay practica un autopsia riba e curpa di Charlie pa asina haya sa mas kico su condicion tabata.
