The content originally appeared on:
Diario
ORANJESTAD (AAN): For di tempo cu a cuminsa cu e ‘Pop-Up Market’ aki, a worde anuncia gran mayoria di bishitantenan a haya esaki un super bon idea.
Esaki ta duna espacio pa nos productornan na momento cu tin produccion nan por ofrece esaki na e clientela. E clientela mes tambe a haya esaki cu a cai den bon tera pa motibo cu nan ta haya e chens di bin bishita Santa Rosa y probecha di cumpra cualkier product fresco den nos Pop-Up Market.
Mas ainda cu e ta tuma lugar cu un poco mas frecuente cu e acustumbrado Mercado Santa Rosa. Pop-Up Market tin menos preparacion, practico y dunando e mesun resultado cu e mercado. Bishitantenan ta haye mas fasil di pasa cumpra y sigui pa e otro puntonan di benta di productonan fresco manera na STR Agriculture situa na Alto Vista of tambe na Yara caminda ta situa 297 Farm. E dos localidad nan aki practicamente tur diasabra tin productonan fresco tambe pa ofrece na e pueblo di Aruba.
Den e corto tempo cu e Pop-Up Market tin ta tumando lugar el a haya un acogida bastante popular entre nos bishitantenan cu ta duna comentarionan hopi positivo. Mester menciona si cu tur cos ta basa riba produccion local. Logicamente si tin produccion local tin producto fresco pa ofrece den nos Pop-Up Market.
Diasabra awo 6 di April bo ta cordialmente invita pa haci nan un bishita y bin disfruta di e Pop-Up Market caminda tin varios product fresco pa ofrece na pueblo di productornan local. E evento ta cuminsa for di 8’or y ta continua te cu 11’or di mainta.
Nan ta suplica otro productornan cu kisas cu ainda nos no a yega cerca nan pa por tuma contacto di Santa Rosa ta telefoon 585-8102 dado caso cu bo tin product fresco pa ofrece pa asina abo tambe por haya e oportunidad di participa den nos Pop-Up Market. Nan ta conciente tambe cu hopi productor local den mayoria caso ta sali for di nan produccion hopi liher sin mester di participa den nos Pop-Up Market of Mercado. Nan ta hopi contento di tende esey y por mira cu tin demanda pa mas produccionan fresco local pa ofrece na e pueblo di Aruba
