The content originally appeared on:
Diario
CMO cu actualisacion tocante incidente di ‘oil spill’
Por spera mas “teerballs” e siman aki
No tin confirmacion si ta azeta procedente Tobago
ORANJESTAD (AAN): Den fin di siman, Crisis Management Office CMO (conoci antes como Rampenbureau Aruba) a duna un update pa e incidente di derame di azeta cu a sosode debi cu e barge ‘Gulfstream’ a kapseis net pazuid di e isla di Tobago. Loke a leak ta Fuel Oil, conoci como ‘Bunkerfuel’.
CMO a informa cu for di e momento cu a siman pasa nan a ricibi rapport tocante e petroleo cu a bay e costa di Boneiro, Aruba a intensifica su nivel di alerta pa Codigo Oranje.
Un Team di Maneho di Incidente a keda establece inmediatamente conforme cu e plan di control di derame di petroleo ( Plan OILIE).
Aruba a intensifica su esfuerso pa scout e costa pa medio di dividi e costa den cinco sector, caminda ta tuma luga exploracion intensivo pa diferente instancia manera DNM, FPNA, DOW, hotelnan bao liderazgo di ATA bou di Cluster 8, y e Havenmeester.
E Team di Maneho di Crisis (CMO) a haci un yamada na poblacion pa raporta cualkier mancha di petroleo nan ta mira, hasta si nan ta situa na luganan remoto.
Detecta manchanan chikito: Danki na e esfuerzo aki, ya riba Diasabra 2 di maart, a detecta ‘Teerballs’ (manchanan di azeta) na un luga conoci pa CMO.
No obstante por ta posibel cu nan ta bini for di e incidente na Trinidad & Tobago, tambe ta posibel cu nan a bin via e ruta di bapornan entre Jamaica y Trinidad door di tanker di petroleo. Tin algun persona na Aruba ta hasta cana cu e teoria, cu ta barconan tankero cu ta saliendo for di Lago di Maracaibo y pasa den e area, lo por ta laga e azeta aki drief.
CMO ta gradici pa e cooperacion cu a haya for di e Team di Maneho di Incidente Aruba, Kustwacht, coleganan di Rijkswaterstaat, e Havenmeester di Boneiro y di Aruba pa e apoyo ricibi. Ademas, Union Europeo a yuda pa medio di programa di Mapping Copernicus EMS pa delinea area di impacto via satelite y modelamento.
Aruba por spera pa e siman cu ta bini ‘Teerballs’, pero scout recien y informacion, manera tambe e Mapping Rapido EMS pa delinea area di impacto cu ta warda ainda, ta sugeri cu e mayoria di e mancha a pasa Aruba. Sinembargo, ainda lo tin ‘Teerballs’ cu ta bay acerca durante e proximo dianan.
Riba potret por mira algun imagen di Facebook relaciona cu loke un turista a mira na beach riba Diasabra cu a pasa.
