The content originally appeared on:
Diario
Bo por paga esaki ainda pa evita presenta dilanti Hues
ORANJESTAD (AAN): Ta saliendo na cla, cu na Aruba ainda tin hopi ciudadano cu a haya un boet pa infraccion cometi den trafico, pero ta djis keda sin paga, kizas a lubida di haci esey.
Ora bo no paga e boet, esey ta pone cu automaticamente lo yega e fecha riba cual bo tin di presenta dilanti Hues den Corte di Husticia na Playa. Y awor a sali na cla cu ta hopi hende ta worde yama pa presenta.
Tabata dia 8 di Februari mes, un total di 623 persona mester a presenta dilanti Huez debi cu nan no a paga nan boet, y cu chens grandi cu Huez a bay hisa nan suma aun mas. Si bo a worde gara cu smartphone den man, e boet ta 500 Florin. Pero dilanti Hues, esaki lo por subi te na 600 Florin.
Riba e fecha di 8 di Februari, tabatin varios ciudadano cu mester a presenta, y por a mira e.o. diferente atleta, comerciante, personahenan di farandula, studiante, y tambe contratista local.
Prefera bay paga boet: Kizas tin hende cu a djis lubida di bay paga boet. Y teniendo na fuenta cu Diahuebs otro siman, esta 29 di Februari 2024 lo bay tin atrobe hopi caso di boet den trafico cu lo worde atendi den Corte. Pero Ministerio Publico den nan afan pa e hendenan paga mas tanto prome cu e fecha, kier mustra cu asina bo ta evita di bay Corte, pasobra eynan bo ta core riesgo cu Hues lo bay hisa e suma di boet.
Ministerio Publico ta yama personanan cu a worde cita pa presenta riba 29 di februari venidero dilanti huez di trafico, pa paga prome cu e dia ey.
Esey por online via cuenta bancario #4000905 di Aruba Bank bao mencion di e parketnummer. Por paga tambe na balie na Ministerio Publico despues di haci un cita via e website www.omaruba.com.
Si bo persona mester presenta riba diahuebs 29 di februari, anto tin te diaranzon 28 di februari tempo pa paga. E citacion ta bin na caduca si bo persona paga na tempo.
Logicamente si en caso hende no ta de acuerdo cu e multa cu el a haya di Polis, e tin tur su derecho pa presenta dilanti Huez. Huez tuma un decision nobo.
Tene cuenta cu Fiscal di Husticia lo exigi un suma mas halto riba 29 di februari y cu por pasa cu Huez bay de acuerdo cu ne.
