Departamento di Impuesto a reuni cu abogado y notarionan riba introduccion di BTW

ORANJESTAD (AAN)– Siman pasa tabata tin un otro sesion importante entre Departamento di Impuesto y diferente "stakeholder" en conexion cu introduccion di un sistema di BTW.

           E biaha aki a toca turno na Orde van Advocaten, Notarionan y Association of Aruban Realtors, e asociacion cu ta representa Vacation Rentals/Vacation Homes, pa debati tocante e propuestanan di Reforma Fiscal 2023 y con esaki lo bay impacta nan negoshinan.

            A haya hopi bon feedback di nan banda y nan ta subraya e importancia di coherencia cu mester tin den tur e propuestanan pa cambio. Tur stakeholder a compronde cu un sistema di BTW lo wordo implementa, pero tabata hopi interesa tambe pa haya sa kico ta e otro plannan di gobierno riba tereno di por ehempel digitalisacion di otro departamentonan den gobierno, griffierechten, overdrachtsbelasting y tambe e ROPV cu lo impacta nan negoshi of manera di haci negoshi. 

Varios punto cu lo atende a corto plaso

            Nan ta considera Departamento di Impuesto un di varios departamento di gobierno cu a digitalisa su procesonan pa asina por traha mas eficiente. Tin preocupacion cu si esaki no sigui na e otro departamentonan di gobierno, cosnan lo pega den e procesonan anticua y lo no por brinda e calidad di servicio cu e cliente y/of esun cu ta brindando servicio na cliente,ta spera.

            "Ta puntonan valido cu a wordo treci dilanti,” segun sra. Luenne Gomez-Pieters, agregando cu nan ta puntonan cu a corto plaso por atende cu nan sin cu mester cambia ley.