Asociacion di Banco a acorda pa suspende ‘fee’ te 1 october

The content originally appeared on: Diario

Minister Geoffrey Wever riba situacion di Stacion di Gasolin  

Consumidor por sigui paga cu carchi na gasoline ‘stations’ 

ORANJESTAD (AAN):  Relaciona cu e situacion recien cu e presenta na e ‘gasoline stations’, Minister Geoffrey Wever a bin cu un actualisacion y a indica diamars atarsi cu manera el a tuma nota di e publicacion di e doñonan di gasoline stations cu nan no lo acepta pago via tarheta mas y solamente cash, el a tuma contacto inmediato  cu Aruba Gas Dealers Association (“AGDA”) y tambe cu Aruba Banker’s Association (“ABA”) pa purba intermedia y wak con por yuda na yega na un solucion.

            Dialuna mainta el a reuni cu AGDA y cu ABA pa scucha nan posicion. A puntra ABA pa temporalmente suspende nan decision pa cobra e ‘fees’ pa un periodo di 3 luna pa asina Gobierno haya tempo pa busca un solucion husto den beneficio di economia Arubiano sin perhudica e situacion financiero di e empresarionan, cual ta opera bou di margin di ganashi stipula pa ley.

            ABA a informa cu nan ta compronde e peticion di Gobierno y cu nan ta suspende nan decision te cu 1 october proximo pa cobra e ‘fees’ pa asina Gobierno haya tempo pa por intermedia y traha riba un solucion.            Mirando e posicion aki di ABA, AGDA tambe a informa e minister cu nan ta suspende nan decision te cu 1 october, pues pa awor tur consumidor por keda paga cu tarheta di debito of credito na cualkier gasoline station.

            E mandatario a gradici tanto ABA como AGDA pa coopera cu mi peticion. E dianan dilanti lo investiga con por yega na un areglo husto, den beneficio di economia di Aruba y tur consumidor, a indica.