Curaçao y Aruba ta duna comienzo pa desaroyo di un conexion cu ferry

Alternativa di transporte entre e dos islanan

• Un paso significativo den direccion di cooperacion maritimo duradero 

ORANJESTAD (AAN): Pa fortalece e laso economico y social entre Aruba y Curaçao, Minister Roderick Middelhof (Minister di Desaroyo Economico, Curaçao) y Minister Geoffrey Wever (Minister di Finansa, Asunto Economico y Sector Primario, Aruba) a duna formalmente e inicio pa e desaroyo di un conexion ferry entre e dos islanan. E iniciativa aki ta representa un paso esencial pa integracion regional, mobilidad y un cooperacion maritimo mas amplio.

   E Conseho di Ministro di e dos paisnan a aproba e Plan di Accion. Cu esaki, Hulanda tambe a aproba e peticion pa financiamento via e Landspakket, loke ta pone disponibel un suma di subsidio pa e prome fase di e trayecto.

   E proyecto ta inclui un estudio di factibilidad conhunto, cu tin den su alcanse preparacion y ehecucion di un destaho publico. Meta final ta pa atrae un operador di ferry competente cu por ofrece un conexion confiabel y futuro-resistente entre Aruba y Curaçao.

   Den e siguiente periodo, lo tuma luga un serie di analisis tecnico, economico y ecologico, tambe un dialogo structural cu stakeholdernan. Si e resultado ta positivo, lo sigui cu e proceso di destaho publico, cu meta final pa otorgacion na un operador den 2026.

   “E proyecto aki ta refleha nos ambicion pa fortalece y amplia nos cooperacion economico y turistico den region. Un conexion cu ferry entre nos islanan no ta solamente un medio di transporte, pero un brùg pa crecemento duradero y un laso regional mas fuerte,” segun Minister Roderick Middelhof di Curaçao

   Minister Geoffrey Wever di Aruba a expresa: “Mi ta particularmente satisfecho cu e proyecto aki cu nos ta desaroya hunto cu Curaçao y Hulanda. Un bon conexion entre Aruba y Curaçao, pa persona y pa carga, lo trece beneficio directo pa nos economia y pa nos ciudadano. Cooperacion regional ta bira cada bia mas importante, specialmente mirando e desaroyonan geopolitico den nos region.”