Partido AVP a sostene corupcion y Partido MEP ta sostene integridad

The content originally appeared on: Diario

Partido MEP na Parlamentario Ryçond do Nascimento 


ORANJESTAD (AAN): Partido MEP un biaha mas a tuma nota di e mente coruptivo di miembronan di e Partido AVP na unda cu Parlamentario Ryçond do Nascimento ta cuestiona Minister President, Señora Evelyn Wever-Croes, riba e tema di integridad.

Señor do Nascimento, den su articulo ta menciona un trahado di Censo cu a horta 68 mil florin. Den e acaso aki, tanto Censo como Minister President a tuma accion inmediato na momento cu a descubri cu e persona aki a horta e placa aki. E persona a wordo geschorst y kita for di trabou di biaha. Un accion cu a bay completamente segun reglanan di integridad den casonan disciplinario.

Accionnan asina pa Partido AVP y su integrante di Partido nobo, señor do Nascemento, ta basta desconoci pasobra nunca nan a actua na fabor di integridad pasobra nunca nan tabata kier a atende cu asuntonan disciplinario. Prueba atrobe cu AVP ta sostene corupcion.

Parlamentario do Nascimento ta culpa Minister President di e hecho cu ta pa motibo cu un persona a baha cu Vut, un empleado di Censo a haya e oportunidad di horta e 68 mil florin aki. Esaki ta un muestra di un mentalidad y intencion meskino y ekiboca di señor do Nascimento.

Partido MEP ta informa Señor do Nascimento cu ora un persona horta, e mes ta e unico responsabel di loke el a haci y no por culpa niun otro persona di esaki. E persona aki a bay cu Vut, Censo a indica cu e no por perde e persona. E persona a splica cu e ta malo di salud y tin urgencia pa bay busca su salud den exterior. Na e momento ey, Minister President a tuma e decision cu ta honra e peticion pa Vut y cuminsa busca reemplaso di inmediato di e persona cu pa motibo di salud no por a sigui traha.

No por culpa Minister President ni Censo cu mientras tabata tin un puesto vacante pa algun tempo, cu un trahado a dicidi di bay horta 68 miyon florin.

E hecho aki, ta cay completamente bou di responsabilidad di e trahado y danki na actuacion rapido di Censo, a constata e ladronicia aki hopi lihe. Minister President y Censo a tuma decision di inmediato y hues a confirma cu e retiro di e trahado aki tabata na su luga y tanto Gobierno, Minister President y Censo a actua corectamente.

Partido MEP ta conseha señor do Nacimento pa stop di busca problema caminda cu no tin. E hechonan aki tabata socede tempo cu AVP tabata na mando y no tabata kier a atende cu e temanan di medidanan disciplinario contra empleadonan cu tabata comete eror. Un biaha mas, señor do Nacimento ta demostra cu di berdad berdad, Partido AVP a sostene corupcion y kier sigui e patronchi aki y Partido MEP ta sostene integridad.