The content originally appeared on:
Diario
Dolor di cabes pa NV Elmar cu kabel bao tera
A busca Generators grandi pa yuda habitantenan
A dura casi 28 ora pa drecha e problema
ORANJESTAD (AAN): Un situacion serio cu a start Diahuebs 14 di Maart 2024 den oranan di mainta, tabata djis e comienso di un dolor di cabes di embergadura grandi pa e compania di electricidad NV Elmar.
E compania awor a divulga, cu en total 50 cliente den barionan di Koyari y San Miguel, den distrito di Noord, ta esnan cu a wordo afecta.
Segun NV Elmar, e compania a ricibi e prome alarma alrededor di 7:30 am, notificando cu tin interupcion di servicio. Inmediatamente despues di e alarma, e compania a manda e tecniconan pa e area pa cuminsa un investigacion pa trata na localisa e problema.
Ora cu e personal a localisa e origen di e storing, mesora a envolvi e Departamentonan concerni, incluyendo Elmar su ekipo di “Underground Services”, tambe e ekipo di “Grid Quality Management”, y a core busca un Contratista pa bay coba banda di caminda. Esey ta debi cu e fayo a wordo localisa bao di tera, esta un kabel di voltahe halto.
Drecha kabel bao tera: Pues NV Elmar a busca un compania di excavacion pa adresa e situacion. Pero tin di corda cu tin cierto regla ora di bay drecha un kabel cu tin poni bao di tera. Esey ta cu e trabaonan di reparacion di un kabel bao di tera no por sosode simultaneamente cu otro! Pues e ta un proceso cu tin di bay paso-pa-paso cu ta inclui:
(1) Elmar su ekipo Grid Quality Management tin di midi e kabel pa localisa e fayo.
(2) Ora e fayo ta identifica, e compania contrata ta cuminsa cu trabao di excavacion na e lugar, y esaki a start Diahuebs merdia banda di 12:00 pm.
(3) Elmar su ekipo di Underground Services ta instala un kabel nobo.
(4) Despues e team di Underground Services ta conect’e na e resto di e kabelnan di e grid den e area.
(5). Finalmente, e kabel ta worde midi atrobe pa sigura cu e problema a worde resolvi.
Solucion temporal pa clientenan: Sinembargo despues di e ultimo paso (#5), un otro problema a surgi unda e kabel aki no a pasa e midimento, indicando cu ainda tin un fayo den e kabel subteraneo di voltahe halto.
E compania NV Elmar ta sigui e standardnan di seguridad y calidad den suministro di coriente. Esaki ta nifica cu tabata rekeri mas trabao di reparacion. Mientras tanto atardi a yega y solo a baha. Ainda no a soluciona e problema di blackout den e sector.
Na e punto aki alrededor di 9:30 pm, e compania NV Elmar a busca un solucion pa nos clientenan afecta den e area aki y a contrata un compania pa instala un Generator industrial pa suministra coriente. Pa haci esey, e ekipo di tecnico- y ingenieronan di NV Elmar a traha sin descanso pa evalua y coregi e situacion aki.
Pues aki ta mira cu e interupcion di coriente a prolonga mas cu loke e compania a pronostica na comienso, y tur esey debi na e retonan cu e trabao di reparacion a trece cune.
Pues den un esfuerso pa minimalisa e interupcion aki pa 50 hogar y negoshi, generatornan a worde desplega pa yuda suministra coriente den e areanan afecta.
Pa NV Elmar, henter e situacion aki ta un caso inusual. E momentonan ey, e causa di e fayo riba e kabel subteraneo no ta conoci ainda.
Mientras tanto Diabierna a yega, y e problema ta andando pa 16 ora y mey caba. Y por a nota hopi reclamo y keho di e ciudadanonan eybanda.
A logra te Diabierna marduga pa 12:30 am, pa e Generatornan na Koyari a manda coriente pa algun di e clientenan cu tabata den scuridad. Similarmente, alrededor 1:45 am, coriente a worde restaura na San Miguel pa medio di generatornan.
Mientras tanto e trabaonan di reparacion y soluciona e problema principal a sigui, pero diripiente den marduga, otro problema a presenta. Nan a experiencia retraso temporal cu e generatornan na Koyari. Pesey mes, NV Elmar a pidi e compania pa manda mas Generator, pa asina suministra mas capacidad den e area.
E trabao di coba bao tera y drecha kabel a sigui, y nan a haya na ta cuminsando di nobo cu e proceso di trabao di reparacion menciona anteriormente. Marduga a finalisa y solo a sali mainta, y keto bay nan ta trahando.
E generatornan tabata sigui funciona pa habitantenan tabatin coriente Diabierna marduga y mainta.
E trabao di reparacion di kabel bao tera a sigui positivamente y tabata bisto cu porfin a logra drecha e problema principal, y Diabierna mainta pa 10:30 am nan a cuminsa cu e fase final di trabao pa asina pone coriente bek.
NV Elmar a registra e ora di 11:11 am como oficialmente e momento cu coriente a bay bek pa tur e 50 clientenan aki. Tur e hogar- y negoshinan tabatin nan servicio di coriente bek.
E compania di electricidad a splica cu nan ta compronde e inconveniencia y frustracion cu e interupcion prolonga aki ta ocasiona e clientenan, y nan ta pidi disculpa pa e inconveniencia cu esaki por a trece cune. NV Elmar a splica cu nan ta comprometi na seguridad y bienestar di clientenan. Nan ta aprecia e pasenshi di e habitantenan na e 50 cas afecta na Koyari y San Miguel.
