Caso Avestruz ta cumpli cu e caracter di Gobierno di AVP!

​

Plan Fondo Desaroyo Nobo San Nicolas y Bo Aruba ta morocho

*Rapport “Bo Aruba”ta splica e fiesta di Family and Friends AVP

*Parlamento mester discuti tambe resultado “Renobacion Aruba N.V.” 

ORANJESTAD(AAN)—“E contenido di Caso Avestruz, no mester sorprende ningun hende. E ta cuadra completamente cu e base di maneho cu a wordo hiba pa Gobierno Henny Eman y Gobierno Mike Eman, cu ta directamente mara na otro, no solamente pasobra ta trata di dos ruman.”

Informacion cu ta wordo presenta na DIARIO, na un momento doloroso pa Aruba, pais respeta pero cu awor mester acepta cu e ta na discusion rond mundo, pa motibo di e Caso Avestruz.

Cu informacion amplio, informantenan ta splica DIARIO cu loke ta pasa awe na Aruba, ta resultado directo di loke ta pasa Aruba for di Prome di Januari 1986 y hasta prome cu e fecha aki, ora AVP tabata busca tur apertura pa haya mando atrobe den Gobierno di Aruba.

Di regreso den historia di Aruba, a wordo mustra Henny Eman riba su mes no por a cambia opinion di e votador. E tabata den necesidad pa sosten di dos persona cu a hunga un papel importante, cu tabata Watty Vos y Mito Croes.

Watty Vos tabata uno di e fundadornan di MEP mientras mr. Mito Croes, tabata un persona di renombre den Reino a base di su conocemento profesional.

Ciere di Lago a habri porta pa Henny Eman a bay dilanti den voto y asina a base di coalicion deshaci politicamente di Betico Croes, cu tabata e Arubiano cu a logra Status Aparte di Aruba.

Mike Eman a bira e sombra di Henny Eman for di Prome di Januari 1986 y participante den e proceso di hipoteca, den cual companianan a haya facilidad financiero pa establece nan mes.

Aruba asina a mira nacemento di su debe di 400 Miyon, den e realidad cu a keda scondi pa Pueblo.

Despues Aruba a wordo sorprende na final di Siglo 20 cu e caso di Fondo Desaroyo Nobo San Nicolas, den cual atrobe un fondo financiero di Aruba a wordo uza pa supuestamente activa economia.

E resultado tabata cu debe cu e Arubiano mester paga awe, a sigui crece y crece, manera e rapport cu a wordo traha dor di Algemene Rekenkamer Aruba, a indica.

Den e rapport aki, prueba a wordo duna con Benny Sevinger y Mike Eman, hunto tabata atende cu votadornan y a base di loke bini dilanti den nan “caminatanan”den Pueblo, tabata ahusta e cantidad di placa di Pueblo cu nan tabata uza pa crea e proyectonan.

Kende a wordo beneficia y con, a keda un pregunta grandi pa Aruba, cu ya tabata bini victima di e Fondo Desaroyo Nobo San Nicolas, cu a resulta den castigo di prison pa Ministronan di AVP, pero no pa e Prome Ministro Henny Eman, pasobra tabata falta un prueba y e tabata e Ministro cu a keda den libertad.

E caso actual contra Benny Sevinger no por ta ningun sorpresa si tene cuenta cu e forma cu gobiernonan di Henny Eman y Mike Eman a atende cu e fondonan di Pueblo di Aruba, cu awe mester paga sumanan enorme di belasting pa asina Aruba por paga su debenan.

Den e totalidad aki ta topa tambe cu e rapport “Renobacion Aruba N.V.”cu a wordo uza pa drecha edificionan bieu segun e sistema di AVP, cu na momento cu Watty Vos a fayece, a habri porta pa sobrino di Watty Vos, cu ta Benny Sevinger, cu a reemplaza e lugar di Watty Vos den e circulo votadornan di AVP.

E sistema di gobernacion di AVP no a cambia y ta basa riba uzo di sumanan enorme di Pueblo pa proyectonan cu ta entrega poder politico na partido AVP cu a destrui e Pueblo di Aruba financieramente y a haci cu awe casnan di famianan Arubano, mester kita placa di nan boca pa nan paga sumanan enorme di belasting a base di e placa di Pueblo cu e gobiernonan di AVP a maneha contra Ley di Contabilidad, manera rapportnan ta mustra.

Den Corte di Husticia e berdad awe ta rementa den e caso di Avestruz, cu realmente ta cuadra cu e maneho di Family and Friends di AVP, productor di e drama social di Aruba den tanto cas di familia cu no a haya tereno pero si mester paga belasting pa e debenan cu AVP a laga atras.