The content originally appeared on:
Diario
ORANJESTAD (AAN): Directiva di Cas di Cultura a mustra cu nan lo celebra dia di Himno y Bandera cu un programa di actividad amplio pa henter famia.
Desde 10’or di mainta to cu 3’or di atardi, mucha y adulto lo por entretene nan mes den esfera di nos dia nacional.
Programa di actividad: E team dinamico di Cas di Cultura a prepara diferente actividad manera Face Painting, Arts & Crafts, un Photo Booth, Dino Jump y mucho mas pa entretene e muchanan presente. Tambe, lo tin un mercado di artesania local.
Festival di sopi: Cas di Cultura ta conoci pa su dushi surtido di sopi riba dia di Himno y Bandera. E aria aki e menu sigur lo conta cu sopi di oester, sop’i pampuna, sop’i carni, erwtensoep y mosterdsoep. Tur aña e benta di sopi ta hopi gusta y e ta un forma pa recauda fondo pa Cas di Cultura, cual ta worde haci posibel cu e ayudo di diferente patrocinado generoso.
Concierto pa mucha: A ser splica na DIARIO, cu pa 12:30’or di merdia, Jaderick Croes hunto cu su amigonan musical lo presenta e concierto pa mucha “Amigonan di Cunucu”, unda muchanan lo por disfruta di musica y instrumento “live”.
E chikitinnan lo descubri e mundo di maraviya y e diferente bestianan cu ta biba den cunucu, Entrada pa e celebracion di dia di Himno y Bandera na Cas di Cultura ta gratis. Pa cada actividad por cumpra tokens pa participa.
