Capitan Soraya di Seleccion Damas Aruba a retira di futbol profesional Hulandes

ORANJESTAD (AAN): Despues di 10 aña hungando den futbol profesional na Hulanda,

e dama hoben Soraya Verhoeven a dicidi pa despedi di e parti grandi y importante aki di su bida.

   Desde cu e tabatin 15 aña di edad, futbol tabata e tema di mas importante.  Tur dia e tabata riba veld, y a forma su bida rond di esey lo miho posibel pa por duna bon prestacion.  E forma aki di biba centraliza na futbol a cambia gradualmente den ultimo añanan.  El a ripara cu pa enfoca solamente riba futbol y prestacion no tabata pe e mihor forma pa su rendimento.

   Na final e ta mira bek atras cu hopi orguyo mes na su carera profesional.

   El a yega di gana premionan maraviyoso cu su team Ajax, el a hunga weganan espectacular den e.o. Johan Cruijf Arena y den Champions League, y a representa cu orguyo e seleccionnan hubenil di Hulanda.

   El a sinti cu e decision corecto di retira di futbol profesional, ta pa enfoca mas den su trabao na Ajax, unda e por apoya e hungadornan, y e damanan hoben den nan desaroyo mental pa nan cumpli cu nan soñonan.

   Ademas, e ta sigui keto bay ta hungando futbol cu Ajax Amateurs, y tambe pa e Seleccion di Damas di Aruba.  Soraya Verhoeve ta keto bay e Capitan di Seleccion Damas di Aruba, y AVB a indica Diahuebs cu Soraya ta un persona kende a hunga futbol y dedica su mes cu hopi pasion y amor.

   AVB na Aruba ta orguyoso di Soraya Verhoeve, pasobra e no a djis demostra cu e Damanan tambe por hunga futbol, pero el a kibra bareranan den futbol como un deportista femenino y alabes inspira comunidad completo.