Cambio di clima ya ta paralisa produccion di cuminda

Organisacionnan mundial ta bati alarma pa cambio naturalesa

*Secura historico na Europa ta afecta produccion campesinonan

*Aruba ta traha riba mas molina di biento pa produci coriente 

ORANJESTAD (AAN) — Na un forma constante DIARIO a bati alarma pa e desaroyonan riba tereno di clima, cu durante ultimo siman tabata motibo pa paisnan grandi bati alarma pa e forma cu produccion di cuminda ta wordo menasa.

Situacionnan preocupante a wordo describi na DIARIO den curso di ultimo dianan dor di informantenan for di Hulanda y otro paisnan Europeo, caminda produccion normal di cuminda, ta wordo menasa pa condicionnan di tempo.

Secura grandi ta azota e paisnan di Europa, cu pa falta di yobida y e constante secura ta mira con produccion di campo ta wordo destrui.

E secura grandi ta bini directamente despues cu e pandemia Covid-19 ya a afecta e produccion di cuminda mientras cu e Guera na Ukraine a afecta produccion di cuminda na entre otro Ukraine, manera ya DIARIO na forma extenso a informa.

Durante ultimo siman paisnan manera Mexico tambe a bati alarma grandi y a adverti cu e produccion di cuminda ta na peliger.

Resultado di e situacion mundial ta cu prijsnan di cuminda ta sigui wordo afecta mientras cu organisacionnan internacional ta bati alarma grandi pa pidi tur pais pa actua segun e Acuerdo di Clima.

Na 2021 tur pais cu a participa na e Cumbre di Clima na Glasgow entre otro a bay di acuerdo pa baha uzo di petroleo y gas na un mometo cu ainda instancianan oficial no a lansa e advertencianan cu awor ta mira luz.

Nacionnan Uni, Organisacion internacional di Meteorologia, ta entre e totalidad di organisacionnan mundial cu ta adverti cu e situacion mundial ta mas serio cu a spera y cu mester actua awor.

Mientrastanto ayera a ricibi informacion di Utilities N.V. cu ta e compania bou cual tanto Elmar como WEB ta resorta, cu nan en busca di un compania cu por percura pa construccion di e di dos parke di molina di biento pa Aruba, cu tambe a compromete su mes na e plan di Nacionnan Uni deshaci di energia produci pa carbon, azeta y gas na 2050 y uza solamente energia cu por wordo renoba.

Informantenan di DIARIO for di Hulanda y Merca ta indica cu e situacion ta mucho serio cu publico kier acepta y cu ya ta nota cambio importante den temperaturnan cu ta wordo midi na mundo, cu a bira mas calor.

Falta di cuminda y e nivel di pobresa lo aumenta rond mundo cu por spera tambe mas actividad dramatico y violento di tempo pero tambe secura serio, manera DIARIO a adverti pa basta tempo.

E realidad di cambio di clima ya ta dramatico y por bisa cu e problemanan, cu durante e ultimo 500 añanan no a wordo registra na mundo, a cuminsa afecta Planeta Tera na forma serio.