The content originally appeared on:
Diario
Director di AZV, Ir. Edwin Jacobs:
ORANJESTAD (AAN) – Edwin Jacobs, director di AZV, pa finaliza e entrevista cu DIARIO, a referi na dos aspecto mas, cu ta interesante. 1. E situacion cu ta presenta cu pashentnan cu ta pidi y a haya cita cu docter di cas y despues no ta presenta. 2. E fase final di e palabracion cu HAVA, cu bin dos post di docter di warda: un na Hospital Horacio Oduber y otro na ImSan.
Tocante e hecho cu hopi no ta presenta na cita, Jacobs a bisa cu e realidad ta cu Aruba ta bibando un momento unda cu AZV ta wordo indica, door di e sector, cu e cantidad di personanan cu ta traha un afspraak y tin e afspraak no ta presenta.
“Nos ta compronde tambe. Specialmente nos ta compronde cu door di adultonan mayor e por ta un problema pasobra e por a conta cu un yiu bin dun’e un man, pero na ultimo ora por ta e yiu no ta haya aprobacion di su hefe pa hacie. Pues, nos tin cu busca un forma di reduci e cantidad cu no ta presenta, pasobra nan ta tuma e lugar di un pashent cu si por a bin”. Edwin Jacobs a bisa.
El a subraya cu esaki ta un problema cu mester atende cu ne, pasobra e ta creciendo, segun e dunadornan di cuido. Pero e ta tumando lugar door di trahado cu a pidi cita pero ora el a bira miho no ta bay docter y no ta meld cerca dje esaki.
Dos post di docter na Warda:
Jacobs a informa tambe cu AZV ta den e fase final di e docter di warda di Hospital, unda ImSan tambe tin cu habri uno, segun nan negociacion final cu HAVA. Kiermen, lo bay tin dos post di docter di warda cu ta bay alivia e emergencia na ImSan y na Hospital.
“Pues, esey nos ta bezig cu ne. Fortificacion di prome liña tin prioridad pa e proximo añanan, inversionnan ta bay ta mas fuerte den e sectornan ey pasobra nos tin cu percura pa e prome punto di contacto ta uno rapido pa haya ayudo medico lihe y no tarda pa despues e tin cu pasa pa segundo liña”, director di AZV, Ir. Edwin Jacobs a bisa pa conclui.
