Awe tarifa gasolin ta subi cu 17,2 cen pa liter

E ta 2,65 Florin pa liter

ORANJESTAD (AAN): Minister di Finansa, Asunto Economico y Sector Primario a anuncia riba Diamars, loke tur hende tabata spera caba, esta cu tarifa di gasolin ta sigui subi.

   Ministro a indica cu prijsnan nobo di benta di combustibel entrante 13 di mei 2026 ta como lo siguiente.

   Gasolin unleaded-premium ta subi cu 17,2 cen, pa wordo bendi awor na 265,2 cen pa liter.

   Diesel Ultralow Sulphur ta subi cu 10,5 cen, pa wordo bendi awor na 257,0 cen pa liter.

   Kerosin ta subi cu 7,6 cen, pa wordo bendi awor na 301,6 cen pa liter.  E prijsnan ta inclui BBO/BAZV/BAVP.

   E aumento den prijsnan internacional pa productonan petrolero ta nifica automaticamente den un aumento di prijs na Aruba. Gobierno a indica cu nan lo sigui monitor e efecto di prijsnan internacional di productonan petrolero riba prijs di Gasolin y Diesel pa consumidor y lo comunica na tempo cualkier decision pa mitiga esaki dentro di e cuadro financiero y cumpli cu e norma di presupuesto manera ley ta bisa.

   Aña a habri cu na Januari 2026, gasolin tabata na 210,7 cen pa liter.  Na Februari 2026, gasolin a bira 213,6 cen pa liter.  Na Maart 2026, gasolin a bira 223,4 cen pa liter.   Na April 2026, gasolin a bira 248,0 cen pa liter.  Awor na Mei 2026, gasolin a yega na 265,2 cen pa liter.