The content originally appeared on:
Diario
ORANJESTAD (AAN) – Cada 6 di Mei ta wordo celebra e Dia Mundial di Filatelia, pa asina conmemora e seyo postal como sistema stampia di corespondencia.
Tambe ta un dia pa rindi homenahe na filatelistanan y esnan cu tin e hobby di colecciona stampia y seyonan postal. Pa añanan largo un cantidad grandi di coleccionista ta mantene e pasatempo suigeneris aki, y ta tin’e vigente te ainda. Na Aruba tin varios coleccionista y artistanan cu ta diseña e stampianan, cu ta solicita y presenta nan diseño anual cu e tema corespondiente, di unda un ta wordo scogi. E ta un manera artistico tambe pa promove Aruba su cultura, su idiosincracia y su talento rond mundo. Y riba su mes ta un pasatempo economicamente costoso.
Filatelia ta wordo defini como e arte di colecta, clasifica, cumpra/bende seyo postal, y diferente otro documento postal, y e estudio di e historia postal. Su nomber ta deriva di e vocablonan griego Philos (cu ta nifica amante, aficion, amor) y Atelia cu ta nifica paga previamente. E filatelista ta e persona encarga di realiza e labor aki.
Manera ta conoci e seyonan postal, stampia, of timbre postal ta piezanan chikito di papel, imprimi cu diverso tema (figura di hende, paisahe, moneda, entre otro) cu ta wordo pega na e cartanan y paketenan postal, pa nan certificacion.
E creacion di Dia Mundial di Filatelia a surgi en conmemoracion di e prome stampia den e historia postal, e asina yama “Penny Black of Penique preto. El a wordo emiti na Britain dia 1 di Mei 1840 y a cuminza circula dia 6 di mey di e mesun aña, y alavez e ta rindi homenahe na e creador di Filatelia Rowland Hill.
Pabien na tur filatelista, coleccionista y artistanan diseñado di e temanan di stampia cu semper ta desplega hopi talento den e arte aki.
