AVP su mocion contra Gerlien y Futuro ta manda un mal señal

ORANJESTAD (AAN): Pa sorpresa di tur hende, den e reunion publico riba Ley di LIM,

lider di Fraccion di AVP a presenta un mocion pa pidi su Gobierno di AVP-Futuro pa nombra un Ministro Plenipotenciario na Hulanda mas pronto posibel, pa por sigui continuidad, representacion diplomatico y reduci riesgo di e interesnan di Aruba den Reino. 

Parlamentario Xiomara Maduro di MEP a reacciona bisando cu ta un berguensa cu un partido cu ta forma parti di e coalicion di gobierno mes, mester bin cu un mocion pa forsa su propio gobierno pa haci algo cu mester ta obvio y prioritario, siendo cu e tin su base den Statuut di Reino Hulandes.

Esaki no ta un mocion di oposicion, esaki ta un grito di alarma for di paden di AVP contra Futuro. E pregunta logico cu ta bin na mente ta, si AVP ta e partner mas grandi den gobierno, di con e no por resolve e problema aki internamente? Con un partido den coalicion mester uza Parlamento pa manda un señal pa su propio gabinete?

   E situacion aki ta revela algo mas grandi, esta cu Gobierno actual ‘no ta comunica, no ta coordina y no ta tuma decision hunto’. Corda cu Ministro Plenipotenciario no ta un puesto simbolico. E ta clave pa defende interesnan di Aruba den Reino Hulandes, maneho di relacion cu Hulanda, representante diplomatico di Aruba y ta garantisa continuidad institucional. Sin dje, Aruba ta perde peso y influencia den Reino Hulandes.

   E mocion di AVP no ta solamente un documento parlamentario. E ta un refleho di un Gobierno debilita, fragmenta, cu falta di liderato y comunicacion, na unda poder interno ta mas importante cu responsabilidad colectivo.