Publico no ta acepta cu ayera a termina na 2020

The content originally appeared on: Diario

Rechazo publico ta haci situacion mundial mas dificil pa maneha — *Mundo di biahe ta prepara su mes pa turismo den recesion  —  *Decisionnan clave na hopi pais mester wordo revoca den crisis

ORANJESTAD(AAN)—“E problema mas serio cu lidernan di paisnan liber rond mundo ta confronta ta, pa haci publico realisa cu cambionan grandi a presenta nan mes na mundo, cu riba tur nivel mester adapta su mes.”

Expertonan riba tereno economico y financiero cu DIARIO a consulta den cuadro di desaroyonan preocupante cu ta manifesta nan mes tanto riba tereno local como internacional, a trece dilanti cu uno di e problemanan mas serio cu tin na e momentonan aki ta e hecho cu hende kier ignora e realidad mundial.

“Mundo ta enfrente un situacion sumamente dificil. For di fin di Segundo Guera Mundial, incidentenan a presenta nan mes pero e colapso mundial di 2020 tabata algo pa cual mundo no tabata prepara,” informantenan ta mustra.

Na e momentonan aki ta sumamente dificil pa haci hende comprende, cu e situacion mundial cu a presenta su mes, no ta algo cu lo conoce solucion riba termino cortico pero mas bien ta inicio di situacionnan serio pa cual comunidad mundial mester prepara su mes y pa cual tur sector mester prepara nan miembronan.

Informacionnan clave cu DIARIO a ricibi ayera ta indica, con na practicamente tur pais mester tuma medidanan di un of otro forma pa atende cu problemanan serio cu a presenta.

Uno di e problemanan serio na paisnan cu clima friu ta e prijs di gas y petroleo, cu a haci cu na e momentonan aki mester lubida clima cu tur resultado cu esaki lo por tin, pa haci uzo di entre otro carbon pa produci calor na lugarnan friu.

Na lugarnan calor, mester mira con ta haci pa percura pa publico por sigui uza airconditioning na prijs cu por paga.

E factornan aki ta mishi cu detayenan di loke ta luho. E aumento mundial di prijs ta nifica cu famianan mester atende cu nan fondonan y mira con ta gasta placa cu prijsnan cu ta subi y lo sigui subi den un careda pa inflacion, cu tur gobierno na mundo ta trata di confronta.

Informacion cu a drenta di aumento di prijsnan rond mundo ta sumamente preocupante mescos cu informacionnan cu ya den mundo internacional di turismo, a cuminsa prepara pa hunto discuti por ehempel “turismo den recesion”.

Pa Aruba esaki sigur ta un topico sumamente interesante ya cu e ta mustra cu pa 2023 mundo di turismo mester tene cuenta cu e resultadonan cu inflacion, y manera ta wordo spera recesion, lo tin pa turismo.

Informantenan ta indica cu e preocupacion mas grandi ta keda cu segun sondeonan oficial, un parti grandi di poblacion no kier acepta e realidad cu ta spera y no ta realisa cu cambio den e estilo y calidad di bida, por crea problema social grandi pa comunidadnan.

“Con publico ta atende cu e realidad actual, ta e punto mas importante,” a wordo trece dilanti.

Informacion debido pa guia tur miembro di comunidad, ta na su lugar. “Mester mantene economia bibo. Esaki no ta nifica solamente hinca placa den un comunidad, pero tambe percura pa bienestar general di comunidad,” un informante a trece dilanti.

El a mustra entre otro riba e responsabilidad mas grandi cu tur hende tin actualmente cu Aruba.

Cada hende for di nan lugar den comunidad mester aporta pa un isla cu ta bisa turistanan, cu ta e entrada importante di e pais, cu Aruba ta un pais trankil, sin criminalidad y caminda hende por sinti nan mes na cas.

E convivencia Arubano mester sobresali den temponan dificil cu mundo ta enfrenta pero den cual tur sector mester yuda structura e pais, segun exigencianan di tempo actual.