Aumenta salario no ta trece solucion: e costo di bo trabao ta subi y prijsnan tambe ta aumenta

​

Director di ATIA Herrick Henriquez:

ORANJESTAD (AAN) – Den entrevista cu e director di ATIA (Asociacion di Comercio y Industria di Aruba), señor Herrick Henriquez, el a señala cu den e reunion cu otro gremionan e aspecto di salario ta algo cu tambe nan a papia di dje.

No obstante cu hopi ta boga pa aumenta salario, Henriquez ta pensa cu riba su mes, esaki no ta trece solucion.

“Pasobra si bo hisa salario e costo di bo trabao ta bay subi tambe anto prijs ta subi e ta bay tin su efecto.

Kico si nos a mira ta cu e generacion nobo kier mas flexibilidad, nan kier traha for di cas, y na nan mes manera, anto esey ta algo cu enberdad ta algo cu den e generacion di nan tata (na manera di bisa) no ta mesun cos. E generacion aki ta uno hopi loyal, nan ta un generacion cu ta keda cu un doño di trabao pa hopi aña, e ‘baby boomers’ tambe”, director di ATIA a comenta.

Pero e generacion Millennials y esnan cu ta sigui nan kier mas flexibilidad, cosnan diferente, nan kier haci uso di tecnologia, etc. Y tocante EPB y Colegio EPI, Henriquez a bisa cu nan ta parti di e plataforma educacion y labor (PEL), unda cu nos ta papia cu e cabesantenan di scol, unda nan tambe por splica cuanto placa nan por gana den un trabao asina, manera un verfdo. Aworaki bo no ta paga menos cu 15 mil florin pa verf un cas di un tamaño normal.

“Por wak cu companianan ta lantando di verfmento, construccion, mezla. Pues den e ocupacionnan aki bo ta haya cada bez mas hende, pero mester cuminza eigenlijk, concientiza e studiantenan cuanto nan por gana den un trabao asina, no riba nan mes so, pero tambe trahando pa companianan di construccion, etc”, Henriquez a señala.

El a agrega cu semper den nan reunionnan cu Oficina di Impuesto y otro stakeholders, ATIA a bisa cu si baha un winstbelasting, un dividend belasting, por stimula e economia, of e comerciantenan pa inverti bek den nan trahadornan.

“Nos sa cu e leynan laboral ta un di esnan mas dificil na Aruba, y si introduci contratonan mas flexible, bo por hacie pa proyecto, etc., esey toch e generacion nobo kier. Pues e parti ey ta algo cu nos a sinta aña pasa caba, den un bipartite cu e sindicatonan unda tambe nos tin, eigenlijk, un acuerdo papiando cu Minister di Labor y su team, ta suppose cu esaki ta atrobe riba mesa pa nos sigui papia over di dje. Un cos bon di dje ta cu den meeting ey a bisa cu ta bay bin un task force. Awo, nos ta bay acerca e sindicatonan atrobe cu e sugerencianan pa wak si nan tambe por support esakinan, pa wak si nos tambe por lanta un task force pa ehecuta e plan cu nos tin”, Herrick Henriquez, director di ATIA, a señala.