Homber a saca arma y mik riba un señora cu mucha chikito den auto

Caya a bira mas peligroso awo

• Polis a logra gar’e y a haya e arma tambe
• Su auto Honda Fit tambe a wordo confisca 

ORANJESTAD (AAN): Polis di Aruba pa basta tempo ta haci peticion na comunidad, pa ban stop cu violencia unda ta haci uzo di arma di candela.  A start tambe cu e campaña solicitando pueblo pa entrega arma di candela, sin cu bo ta haya problema cu husticia.  A instala varios box di hero special pa bo pone e arma aden.

   Sinembargo loke a socede Diasabra atardi pariba di cura di Aeropuerto di Aruba, ta algo insolito y hopi serio mes!  E mester ta algo cu Fiscal di Ministerio Publico tuma un actitud raro pa loke un homber a comete.

   E atardi ey, un señora ta coriendo riba e caminda di Cas Paloma pa Aeropuerto, y a bin haya e caminda blokea.  Un auto para mey-mey di caminda, strobando trafico di sigui.  Tabatin un homber para ta haci maniobranan pafo di e auto cu ta blokea trafico. Esaki ta pariba di cura di Aeropuerto.

   E señora den otro auto a mira cu e tin chens di pasa un banda toch, pero pa siguridad el a djis pita su auto pa avisa e persona cu e ta pasando.

   Ta parce cu e persona para pafo lo a tuma e pita cortico aki como un insulto, y el a rek man, gara un arma di candela, y apunta riba e señora cu e momento ey ta pasando poco-poco pa e por sigui su caminda.

   Ora cu e señora a mira con e homber ta expresando palabranan di insulto, y ta keda mik cu e arma di candela riba su auto, esaki a dune un spanto enorme, y el a primi trot y bay.  E no sa si acaso e homber a tira of no.

   El a bay para te banda di Airport, y aki el a yama Polis pa raporta loke a pasa, indicando cu e cu su yiu chikito a keda tur spanta.

   Central di Polis na un forma tactico a core notifica tur unidadnan den area di Playa y Mahuma pa acudi, y a ricibi descripcion di e auto cu ta un Honda Fit hatchback color shinishi cu number A-21217.  El a mira cu despues e homber a drenta e auto aki tambe a cuminza core.

   Pa suerte unidadnan Motoriza di Polis tabata eybanda, y varios patruya mas a cuminza core, y nan a hasta blokea salida di caminda di Aeropuerto, y Polis a cuminza core den direccion contrario pa mira si e auto Honda Fit ta saliendo.

   Nan a bin topa cu ne ta yegando Hyatt Place, y ta bayendo pa pasa dilanti Golden Dragon Restaurant, cu tin net pariba di Airport Parking.  Aki nan a blokea e auto, y a stop esaki full net yegando e Spiral Rotonde di Green Corridor.

   Polisnan a baha ta hands-up e chauffeur como cu nan sa cu e ta ‘vuurwapen gevaarlijk’, y cu e tin un arma den su poder.  El a hisa su mannan, y a sigui ordo pa habri porta di su auto, y a bay na rudia y despues drumi completamente riba asfalt.  Asina nan a yega cerca y corectamente a pone boei na su mannan.  Mas unidad di Polis a keda yega cu sirena eynan.

   Despues cu nan a caba di arest’e, nan a bay check y listra e auto y a bin haya un pistol preto eyden benta.  Mesora esaki a wordo confisca.

   A manda busca Vehiculo di Transporte, cu a bay cu e homber deteni rumbo pa Warda di Polis.  A manda busca team forensico di BFTO, cu a bin documenta unda a haya e arma benta den e auto, y nan a piki e arma y pone den saco di plastico.  Polis a confisca e Honda Fit tambe, y awor tur cos ta den man di Fiscal.  Pueblo ta spera cu Ministerio Publico tuma bon medida contra e homber aki cu ta djis menaza hende inocente riba caya, incluyendo mucha chikito di bao di 10 aña.  DIARIO a compronde cu e mucha a spanta asina hopi, te cu e anochi ey e no kier a drumi na su cas, y a roga pa e bay drumi cerca su wela.  Aki por mira cuanto efecto e acto di e homber anti-social aki a ocasiona.