Aruba ta haya un Battery Energy Storage System di capacidad di 35MW

WEB Aruba cu proyecto parke grandi di bateria

• Rumbo pa 50% di energia renobabel pa 2030 

ORANJESTAD (AAN): E proyecto yama BESS II, cu ta ser referi na un ‘Battery Energy Storage System’ ta planea pa tin un capacidad di 35MW (70MWh), y e ta bay wordo construi na Aruba, y asina bira e parke di bateria mas grandi den Caribe. E proyecto ta plania pa keda cla na 2028. Diaranson e comienzo di e proyecto a wordo lanza. 

   BESS II lo forma parti di e energy mix di WEB y lo contribui na un red di energia mas stabil y confiabel. Asina WEB por integra cada bes mas energia renovabel y sigui ofrece un suministro di energia confiabel, pagabel, sostenibel y safe.

   BESS II ta un paso importante pa realisa e meta nacional pa na 2030 un promedio di 50% di e suministro anual di energia, ta procedente di fuentenan renovabel. E sistema to had posibel pa almacena mas energia di biento y solo y uza esaki eficientemente ora tin necesidad di dje. Na mes momento, BESS II lo contribui na un red di energia mas stabil y confiabel.

   Un bateria grandi pa Aruba Energia di biento y solo no semper ta disponibel na e momento cu demanda di coriente ta mas grandi. Cu BESS II, WEB temporalmente lo por almacena e energia aki y pon'e disponibel ora tin necesidad di dje. E sistema lo tin un potencia pa entrega un maximo di 35 megawatt (MW) y por almacena un total di 70 megawatt-hour (MWh) di energia. Na palabra simpel, si e bateria ta na su capacidad maximo, teoreticamente e por entrega 35 MW durante mas o menos 2 ora.

   Lo integra BESS II cu parkenan di biento y solo y e sistema di maneho di energia di bateria (GEMS) hunto cu e sistema inteligente di maneho di produccion (IGMS) di WEB. Die forma aid almacenamento den bateria lo bira un parti integral di e energy mix di WEB, hunto cu e motoman RECIP, energia di biento, energia solar y e turbina di gas. Por medio di tur e sistemanan automatisa, lo determina continuamente cua fuente di energia ta mas eficiente pa uza na cada momento. Die forma aki, WEB ta percura pa un suministro di energia cu ta confiabel, pagabel, sostenibel y safe.

   Aparte di almacenahe di energia, den cuadro di e meta nacional di 50% energia renovabel, WEB desde fin di 2025 ta preparando e trayectonan necesario pa amplia capacidad di parke di molina di biento na Vader Piet y realisa un di dos parke di molina di biento na Rincon. Den e proceso aki ta traha hunto cu Gobierno, NGO-nan y otro stakeholders, cu e meta di desaroya energia renovabel na un forma transparente.

   Subsidio di Hulanda Durante e ceremonia CEO di WEB Aruba sr. Alfredo Koolman a expresa su gratitud special na M in isterie van Economische Zaken en Klimaat di Hulanda, pa e subsidionan cu ta contribui na e transicion energetico di Aruba.

   Pa realisa BESS II, WEB a firma un acuerdo cu partner strategico Wärtsilä, despues di un periodo intensivo di preparacion y estudionan di factibilidad. Cu e ceremonia diaranson anochi, den presencia di dignatarionan y invitadonan, a marca oficialmente e inicio di e proyecto. Koolman a gradici tur e teamnan envolvi di WEB y Wärtsilä, pa nan esfuerso conhunto pa por inicia e proyecto BESS II.