Artista Belinda de Veer ta presenta su interesante Expo “Fissures” na Museo Arkeologico

Desde 6 di December 2021 te 1 April 2022: --- ORANJESTAD (AAN) – Na Museo Arkeologico a tuma lugar un conferencia di prensa, den cual a duna di conoce, cu e exposicion titula “Fissures”,

            di e artista local Belinda de Veer, lo wordo presenta den MANA, cual apertura lo ta Dialuna otro siman, esta dia 6 di December.

            E coleccion aki di obranan di e artista aki ta wordo presenta cu sosten di Prins Bernhard Cultuurfonds Caribe y Museo Arkeologico Nacional Aruba (MANA). E obranan sorprendente aki, a wordo crea e ultimo tres añanan y tin un mensahe profundo di e confrontacion di e ser humano cu e cuestion di bida y morto cu ta concerni nos tur. E exposicion ta mustra con bida tin su rupturanan y con pasahero, tur cos ta.

            E exposicion di Belinda ta cuadra cu e proyecto “Manteniendo Herencia Bibo den Tempo”, cu MANA ta desaroyando cu sosten di UNOCA. E proyecto ta enfoca riba e experiencia humano y su rastronan na Aruba cu, entre otro, e famia Ecury nan monumentonan y nos antepasadonan, a laga.

            “Fissures” ta un oportunidad pa reflexiona riba confrontacionnan fuerte den bida, cu nos tur ta enfrenta na un momento of otro. Pa e artista Belinda de Veer, e obranan aki a facilita su purificacion emocional na ocacionnan cu bida a presente retonan grandi. Pa publico, e exposicion aki ta un oportunidad pa reflexiona y aprecia cada momento cu bida ta ofrece. Sigur awo cu nos ta biba den un epoca unda nos a ser confronta diariamente, cu e efectonan na nivel global di e pandemia.

“Fissures” na MANA lo ta habri di 9’or di mainta pa 4.30 or di atardi, for di Dialuna 6 di December 2021, te Diabierna 1 di April 2022 den siman.

            Durante e conferencia di prensa a hiba palabra Renwick Heronimo, Belinda de Veer y señora Wever.