The content originally appeared on:
Diario
Avion a planea pa baha bek na Curaçao prome…
Aterizahe sin problema na Aruba
ORANJESTAD (AAN): Un situacion di emergencia a presenta su mes Diadomingo atardi, ora cu un avion Boeing 737-900 di United Airlines cu a caba di sali for di Aruba rumbo pa Washington Dulles International Airport na Merca, a detecta un alarma di candela.
E momento ey e avion tabata 12 minuut caba den su vuelo na altura di 24.000 pia panort di Aruba.
Tabata Diadomingo atardi pa 4:57 pm, cu e avion cu matricula N61886 cu e avion a lanta for di pista di Aruba pa vuelo UAL-1648 cu lo a bula cuatro ora y mey largo pa yega Washington.
Sinembargo pa 5:09 pm, e personal di e avion a notifica Curaçao Control cu nan lo keda bula na 24.000 pia por lo pronto pa check un alarm cu a activa den nan cockpit.
Pa 5:11 pm, capitan di avion a informa cu “Luz di Candela” a cende den e sistema di ‘Fire Detection System’. Tambe a informa cu personal di cabina sinta mas patras den e avion, tambe ta sintiendo un sonido straño, manera un ‘hum’ inusual.
Despues di a haci consulta cu United Maintenance, capitan di e avion a pidi pa 5:15 pm pa nan bira bin bek pero ateriza na Aeropuerto di Curaçao, y a pidi pa prepara Bomberonan.
Aeropuerto di Curaçao e momento ey a declara Groot Alarm, y a cuminsa prepara Bombero, y tambe desvia avionnan cu ta pasando den e area unda e Boeing 737 ta bin for di panort.
Pa 5:18 pm, Curaçao Control a manda e avion baha te na 7.000 pia di estatura, y sigui bin rumbo pa Curaçao.
Sinembargo pa 5:24 pm, Capitan di e avion a indica na Curaçao Control, cu nan a caba di tuma decision pa bay baha bek na Aruba mes. Mesora Curaçao Control a pidi nan pa keda bula na 10.000 pia, y a manda nan bira rumbo west pa Aruba.
Pa 5:28 pm, e Alarma a wordo bati na Aeropuerto di Aruba, y mesora unidadnan di Crash Trucks a subi y posiciona nan mes a lo largo di pista. Riba caya tambe a desvia trafico for di puntonan strategico.
Pa 5:30 pm, e avion a wordo ordena pa baha te na 7.000 pia, y a pasa panort di Aruba, y pa 5:31 pm a comunica bek cu Toren di Aeropuerto Internacional Reina Beatrix.
Pabao di Aruba, a bira na un short-final rumbo pa pista, y pa 5:43 pm, Toren a duna nan permiso pa ateriza. E avion a baha pa exactamente 5:46 pm, y como cu no tabata mira nada di candela pafo, nan por a bay para na Gate.
Finalmente vuelo UAL-1648 a wordo cancela, y no a sigui mas. E vuelo di Dialuna atardi si a tuma lugar, pero aki a usa un otro avion, esta un Boeing 737 cu matricula N37462.
“E vuelo cu a regresa no a impacta otro vuelonan y Airport por a sigui opera normal”, segun vocero di Aeropuerto a indica.
