The content originally appeared on:
Diario
Parlamentario Alvin Molina MEP:
ORANJESTAD (AAN) – Den entrevista cu DIARIO, Parlamentario Alvin Molina di fraccion di MEP, a comenta cu e conclusion cu por yega na dje, tocante e servicio cu Departamento di Infrastructura y Planificacion (DIP) ta duna pueblo di Aruba ta cu ainda falta hopi trabao pa haci, pa por yega na un servicio optimal, pa elimina completamente tur e retrasonan cu tin, por ehemplo pa loke ta erfpacht, huurgrond, terenonan comercial, etc.
“Kiermen, tur dia nos por scucha e kehonan, preocupacion, soñonan, plannan, cu a cay na awa, di famianan cu kier traha nan hogar, comerciantenan cu kier cuminza of expande, un negoshi, y simplemente pa añanan largo no por haya un contesta. Anto, e ora ey como Parlamento ta nos deber pa yama aden e mandatario cu ta responsable pa departamento, pasobra esey ta nos palabracion” Molina a menciona.
Parlamentario Molina a indica cu enberdad el a yama e minister aden, despues di un aña cu a cambia na DIP, y a puntre kico ta e update, kico por bisa tocante e plannan cu tin, e vision, con ta bay mehora e servicio di tanto producto cu DIP ta duna na pueblo di Aruba, pa por compronde kico ta pasando y evalua si ta necesario pa pidi e minister a, kizas, interveni atrobe. No obstante el a wordo informa cu tur e autoridad a wordo duna na e director di e Departamento.
