Accident frontal na Savaneta a cobra bida di hoben Kevin Tromp

ORANJESTAD (AAN): Menos di 3 ora prome tabatin un accident fatal caba na Palm Beach. 

Ata Diadomingo mainta ora cu solo ainda no a sali, esta pa 6:05 am, Central di Polis ta wordo notifica di un accidente frontal fuerte riba caminda principal di Playa pa San Nicolas, na altura di  Winter Garden Supermarket na Savaneta.

   E prome unidad di Polis di San Nicolas cu a yega eynan, a bin topa cu un boksmento entre un

Truck y un auto sedan.

   Ta trata di auto Kia Rio color cora cu number A-62040 cu a bay dal den un Truck marca MAN, di e compania BSL Laundry cu number DT-1280.

   Mayoria di daño material tabata riba e auto sedan, y ora Polis a bay check e condicion di e persona tras di stuur, nan a nota cu e ta hopi grave y pesey a pidi pa un ambulance cu urgencia.  Nan a agrega mesora cu e persona tras di stuur di e Kia Rio no tabata reacciona.

   Ambulance a yega na e lugar di accident, y mesora e paramediconan a pone aparato pa check señal vital di e persona hoben, pues a haci nan maximo esfuerso pero no por a haci nada mas pa e victima.

   Na final, Ambulans a pidi Centro di Alarma pa manda un Docter na e lugar pa asina check e persona.  Di e forma ey, pa 6:50 am, Dr. Mungra a constata morto di Kevin Ruben Tromp, naci dia 12 augustus 2005 na Aruba, pues tin 17 aña di edad.  Debi na su edad, Polis no a haya rijbewijs den su poder tampoco.

   A manda busca Polis di trafico, y personal forensico di BFTO pa haci un investigacion, y trata na mira pa ki motibo e Kia Rio aki a cuminza core full na e banda robez di caminda.

   Bureau Slachtofferhulp tambe a presenta na e lugar pa brinda sosten na famia di e fayecido.

   Kevin a fayece lagando su mama y su ruman muher atras.

   DIARIO y Cuerpo Policial ta manda palabra di profundo condolencia na famia di e fayecido y desea nan forza den e dianan nos dilanti.