The content originally appeared on:
Diario
ORANJESTAD (AAN): Diabierna merdia e yamada a drenta na Central di Polis, y mesora a despacha unidadnan di Polis di Playa riba Frankrijkstraat,
como cu na e T-weg net banda di sede di IBiSA tin un accident serio cu a socede.
Polis a yega na e T-weg cu tin net dilanti IBiSA mes, y a bin nota cu un auto compacto Hyundai Getz color blanco cu number A-19517 a subi caminda, net ora cu un Scooter color cora ta pasando.
E motociclista a dal cu su curpa den auto, y bay finalisa riba caminda unda e tabata sclama di dolor inmenso. Algun persona a core yega, y a cuminsa duna un man pa evita cu e ta sigui move su curpa. Algun a bin cu un serbette pa asina dune un poco sombra di e solo cayente, y pone algo bao di su curpa pa reduci impacto di e asfalt cayente.
Mayoria di e golpi cu el a ricibi tabata na su pia. Ambulans tambe a yega mesora, y paramediconan a stabilisa e victima, y a pone boca abao riba brancard pa minimalisa impacto, y cu urgencia a sali cune rumbo pa Servicio di Emergencia na Hospital.
E camindanan banda di IBiSA aki semper tabata wordo considera como 2 T-weg banda di otro. Pues e no ta wordo considera como un cruzada unda trafico di man drechi tin preferencia.
A manda busca Specialista di Trafico pa yega eynan tambe pa tuma dato.
