A yega ora di revisa y reforsa e leynan pa proteha bestia

​

Comunidad di Aruba a bisa ta basta!

*Caso di Khaleesi ta marca un precedente pa actua awo! 

ORANJESTAD (AAN):  Den un realidad masha tristo mes comunidad di Aruba mester a confronta durante Semana Santa, un biaha mas, un caso cruel di abuso contra animalnan, cual ta un problema cu mester atende seriamente cu ne.

            E caso di Khalessi, un puppy di apenas un aña, cu a wordo maltrata di un forma masha cruel mes, no tin pordon y hopi hende den comunidad ta sclamando pa husticia.

            Tur dia ta yega tende di casonan di maltrato cu ta sosode na e isla, y esaki mes ta un yamado urgente pa accion y stop di djis papia.

            Den un isla caminda naturalesa ta un parti esencial di e cultura y unda hopi di nos ta cria animalnan como miembro di nos famia, no por tin luga pa abuso. Tin cu bira un prioridad pa reforsa e leynan cu ta proteha nos amigonan cu no por papia pa nan mes.

            Esaki no ta solamente un deber moral, pero tambe pa garantisa cu nos tin un ambiente saludabel y sigur pa tur ser bibo na Aruba, cu por ta un cacho, un pushi, un prikichi, un baca, cabrito, etc.

            P’esey, gobierno, como e organo ehecutivo y tambe Parlamento (como representante di pueblo) tin un papel crucial pa hunga. Nan mester sigura cu e leynan ta actualisa  y ta suficientemente fuerte pa proteha animalnan contra abuso y crueldad. Esaki por inclui aumenta castigonan pa e delitonan relaciona cu maltrato animal, manera abandona di animalnan, maltrato físico y emocional, y uso indebido di nan pa entretenimento.

            Ademas, mester tin mas esfuerzo pa educa e comunidad riba e importancia di trata nos animalnan cu respet y cariño. A pesar cu por mira algun campaña tumando lugar na scolnan tambe, por organisa campañanan di concientisacion den comunidad pa enfatisa e deber cu tur hende tin pa trata animalnan manera miembro di nos sociedad. Y banda di esaki, mustra riba e consecuencianan den caso cu comete cualkier sorto di abuso of crueldad.

            Pa evita mas caso di maltrato, tambe ta importante establece un sistema di reporta maltrato cu ta efectivo. Comunidad mester tin e confiansa pa reporta casonan di abuso, y e autoridadnan mester reacciona prontamente pa investiga y tuma accion adecua.

            E sistema actual cu tin, por mira cu ainda ta hopi zwak y banda di esaki, e no ta wordo mira como uno fuerte ni cu poder pa actua contra esnan cu ta comete cualkier sorto di maltrato.

            Na final, proteha nos animalnan no ta solamente un deber moral, pero tambe un refleho di nos mes como comunidad. Reforsando e leynan y educando comunidad, por crea un ambiente unda tur ser ta biba den paz y harmonia, enfocando tambe riba e imagen cu e turista cu ta bishita e isla ta bay keda cu ne.

            Nos animalnan merece esaki tambe, y nos mester sigura cu nan tin nan lugar den nos sociedad.

            Locual a pasa cu Khaleesi no por sosode nunca mas. Aruba mester stop cu e crueldad y abuso contra bestia.

            Adhunto, un potret di Khaleesi, cu Fundacion Luna a publica riba nan Facebook Page.