The content originally appeared on:
Diario
ORANJESTAD (AAN): Un acuerdo di MoU a wordo firma entre Ministerio di Salud Publico,
na encargo di Ministro Dangui Oduber cu director Gino Goeloe di Wit Gele Kruis, y president di directiva Edwin Roos di WGK. Ministro Oduber hunto cu Minister Endy Croes a hiba palabra y ricibi presentacion di drs. Janice Essers-Hooft y drs. Jan Hubert di Jeugdgezondheidszorg departamento di salud (JGZ) di e modernisacion di e programa actual cu JGZ ta uza y con esaki lo transforma pa un sistema di registracion den forma di “cloud based” pa asina cada mucha por tin nan social-medisch dossier den un forma electronico cu lo yama “Electronische Kind Dossier”.
Minister Oduber a menciona cu e modernisacion di e sistema aki lo percura cu cada caso di muchanan lo por wordo registra, analisa y conserva den manera mas efectivo y eficiente pa e profesionalnan den salud. Tambe e modernisacion lo minimalisa erornan den registracion, lo por hasi e intercambio entre medico y psicologo mas facil.
E firmamento di MoU ta sumamente importante pa comunidad y lo percura cu e protocol di privacidad ta keda uno strak y ancra den loke por y no mag y kico lo mag di ta visible. Lo garantisa e seguridad di muchanan danki na e trabao di empleadonan di departamento di salud publico.
Minister Dangui Oduber ta contento di e profesionalismo y e bon synergia di trabao entre tur organisacionnan cu a hasi e esaki posibel awe. Tambe kier gradici ful e ekipo di Jeugdgezondheidzorg, Wit Gele Kruis y DVG pa nan tremendo colaboracion tur e añanan aki na bienestar di e salud di nos muchanan y pa semper keda educa y guia mayornan den con pa yuda nan yiunan tin e miho calidad di bida.
