Local News

Solamente 25 mil hende a habri nan cuenta di BOi di Impuesto

19 November 2026
This content originally appeared on Diario Online.
Promote your business with NAN

Meverly Romano, Relacionista Publico:

  • DIMP tin 3 dia mas pa duna asistencia den bario pa habri nan BOi 

ORANJESTAD (AAN)-- Meverly Romano, Relacionista Publico di Departamento di Impuesto DIMP, a relata den entrevista cu DIARIO, cu nan ta sigui duna asistencia na personanan cu mester di esaki pa habri nan cuenta di Bo Impuesto, conoci como ‘BOi’.

   Na Mei nan a habri e portal pa personanan priva, y na Augustus a cuminza duna asistencia na personanan cu tin e necesidad pa esey. Nan a sigui na September,  October y aworaki na November.  “Nos a cuminza atrobe cu otro ronda di ayudo y aworaki nos tin tres dia mas planea, pa duna e ayudo aki”, Meverly Romano a indica.

   Fechanan nobo: E dianan aki ta: (*) Diamars 24 di November, na MFA Santa Cruz.  (*) Diaranson 25 di November na MFA Paradera.  (*) Diahuebs 3 di December na Theresita Center na San Nicolas.

   Horario: “Nos ta brinda ayudo parti mainta, atardi y anochi. Mainta ta di 8’or pa 11’or, anochi ta 5’or pa 8’or”.

   “Nos tin cu bisa cu e asistencia te aworaki tabata increiblemente bon; hopi persona a acudi y hopi persona nos a logra yuda crea nan cuenta, habri nan cuenta di BOi y drenta den e portal, splica nan den corto kico nan ta wak, kico ta mas of menos e servicionan cu e portal ta ofrece, y nos tin hopi feedback di e clientenan cu ta hopi satisfecho di esey. Loke nos por recomenda aworaki na personanan cu ainda mester ayudo pa acudi na e lugarnan cu mi a caba di menciona, y asina nan tambe nan por tin nan cuenta di BOI pa nan por drenta y disfruta di e servicionan cu e sistema ta ofrece”, señora Romano a señala.

   El a agrega cu tin un grupo grandi cu falta ainda. DIMP kier yega alrededor di 50 mil usuario, y na e momentonan aki nan ta na 25 mil. Kiermen, falta mita ainda, pero e ta bayendo.

   Na Camacuri: “Tur dia nos tin un cantidad grandi cu ta registra, kiermen nos ta hopi positivo pa e banda ey. Y nos ta brinda asistencia tambe pero no den bario so.

   Tur dia nos salanan ta yen cu clientenan cu tin cita pa haya e ayudo aki y esey ta keda continua, apesar cu despues nos no ta bay den bario mas, nos ta sigui toch akinan na Camacuri pa duna asistencia y e clientenan por yama nos, of bin personalmente, nos ta regla un cita mesora pa nan”, Meverly Romano, Relacionista Publico di DIMP a relata.