Shomari Hazel ta sigui su soño pa bira militar

Di SVT pa Arumil:

ORANJESTAD (AAN): Bira militar semper tabata e soño di Shomari Hazel. E ambicion aki a motiv’e pa drenta e trayecto di Formacion Social di SVT, cu el a completa cu exito. Awor, e hoben ta duna un siguiente paso den su desaroyo, cuminsando un carera den servicio di Arumil.

   Den un entrevista cu DIARIO, Hazel a expresa su gratitud pa e apoyo y motivacion cu el a ricibi durante su trayecto na SVT. Segun el a splica, e formacion a yud’e fortalece su disciplina y prepar’e tanto mentalmente como fisicamente pa e exigencianan di servicio militar.

  Cu su experiencia, Hazel kier inspira otro hobennan cu tin e mesun ambicion pa considera un carera militar y tuma e decision di solicita cu seriedad y compromiso. El a destaca cu e formacion y experiencia cu nan ta adkiri por contribui na nan futuro profesional, tanto como militar, den servicio di Gobierno como den sector priva.

  Hazel a menciona e oportunidad di sigui siña, ricibi entrenamento, asumi diferente tarea y bishita otro pais como algun di e aspectonan cu tambe ta motiv’e den e carera aki. Den su bista, servicio militar ta ofrece e posibilidad pa desaroya habilidadnan nobo mientras cu ta ricibi un salario.

   Su mensahe na otro hobennan ta pa nan explora e oportunidadnan cu tin y traha cu dedicacion pa alcansa nan metanan, mescos cu e ta haciendo awor.

   Inscripcion pa Arumil ta habri te cu dia 31 di december. Hobennan interesa den un carera militar por inscribi via werkenbijdefensie.nl/arumil.