Mike de Meza a dicidi na bula cura den Parlamento

E ta sinti cu AVP a lag’e na caya

* Futuro a manda mensahe di lo no sostene su mocion 

ORANJESTAD (AAN): E tabata un fin di siman unda ta tur cos a socede durante e reunion di Parlamento, pa discuti riba e Presupuesto Supletorio di 2027 y na final un sorpresa caminda e politico respeta Mike de Meza a sinti cu e ta miembro di un partido cu no ta dune sosten mas.  Cu su conocemento di tempo cu e tabata e autor principal di e Reparatietoeslag durante su funcion como Ministro di Finanzas na 2016, awor Mike de Meza tambe a traha un mocion pa pase den e reunion aki cu ta pusha pa Salario Minimo wordo introduci na 1 Januari 2026, y pa su sorpresa a bin haya sa cu e partner di coalicion no ta OK cu e mocion di De Meza.

   Por mira pues cu e partido chikito den Gobierno tin extremadamente hopi poder riba AVP, y mirando tur esaki, e ora Mike de Meza a bisa cu te aki el a yega, y a djis lanta cana y bandona fraccion di AVP.  El a bula cura y awor ta yamando su mes Independiente den Parlamento.

   E mocion di Mike de Meza ta pa hisa salario minimo instantaneamente cu dos cien Florin, cu caminda habri pa sigui hisa esaki.  Aki el a inclui un proceso unda gastonan di compania por wordo compensa via di e.o. impuesto cu bista riba cifranan di negoshi.  Asina bo ta evita cu ta kraak negoshinan cu e aumento di salario minimo.

   Na momento cu De Meza a bin haya di su mesun fraccion, cu Ministro Gerlien Croes a bisa cu nan fraccion di Futuro lo no acepta e mocion ey, simplemente pasobra Futuro no kier pa e aumento ey socede entrante 1 di Januari 2027, pero un fecha mas despues.... el a saca su conclusion mesora, y a keda sorprendi cu  miembro di coalicion tin asina hopi poder riba AVP cu tin 9 asiento.

   Na final di e reunion maratonico y yen turbulencia, riba Diasabra marduga a aproba un otro mocion cu ta pidi Gobierno pa hisa salario minimo cu 200 Florin netto pa 1 di Maart 2027 (sin exigencia di hisa esaki na igual nivel di bestaansminimum), y ta inclui compensacion pa negoshinan, pa no pasa e gastonan adicional riba pueblo door di aumenta prijs di tur producto y servicio.

   Sinembargo 11 Parlamentario a abstene di vota, y solamente 10 persona a vota pro pa e mocion aki wordo acepta.  Esnan cu a vota pro ta Gino Goeloe, Ruthlyn Lindor, Muzaninn Wever, Jennifer Arends-Reyes, Carlos Bermudez, Dennerich Kelly, John Hart, Clifford Heyliger, Stephany Sevinger, y Marlon Sneek.

    Ni Thomasia Otami y tampoco Mike de Meza, ni Eduard Pieters a vota.  Tampoco ningun hende di fraccion di MEP.