San Nicolas a sufri hopi di awacero cu inundacion

ORANJESTAD (AAN): Mientras cu demas barionan a cuminza ricibi awacero pisa ora cu ya caba solo a sali,

sinembargo tanto San Nicolas y tambe Savaneta tabata bao constant yobida fuerte ya desde oranan di marduga.

   Resultado di esey ta inundacion pisa den diferente sector di e dos distritonan aki.  Uno di nan cu a yena cu awa, y inunda casnan ta Bernhardstraat na San Nicolas.  Specialmente e area di T-weg net unda ta bay pa Botica 4 Centro Medico, poco pariba di Quality Hardware Store.

   Dado momento Polis y DOW a dicidi pa pone baricada pa cera e caminda aki, debi cu e nivel di awa ta asina halto cu chauffeurnan no por mira unda e caminda ta, y tampoco e acera.  E potret aki pa cortesia di Cuerpo Policial di Aruba.

   Polis a duna Diadomingo mainta un advertencia na tur automobilista pa evita di subi caya sin cu tin mester.  E yobidanan aki cu algun caminda a dura como 4 ora y mas, a satura tera asina rapido, y caminanan a cuminza yena.  Habitantenan a splica cu tin algun tapadera di riolering cu a tapa, y no tabata yuda cu e afvoer di awa.

    Na Savaneta tambe, na altura di e area di Lucky Family Store cerca di Savaneta 490 tambe, e caminda principal di Oranjestad pa San Nicolas tabata completamente bao awa.  Asina hopi awa a cay y no tabatin lugar pa bay.  Autonan abao tabatin dificultad pa pasa, y solamente pickup halto y demas vehiculonan 4x4 y truck por a pasa trankil.

   Henter Diadomingo, por a nota personal di Crisis Management Office (CMO) tambe riba caya ta acudi na tur situacion di emergencia pa mira ki medida tin di tuma pa salvaguardia ciudadanonan y nan pertenencianan.

   Hopi yobida e Diadomingo marduga aki, cu hopi lamper cu strena cu tambe a ocasiona fayo di coriente algun caminda, manera por lesa den otro relato awe den DIARIO.